Read Xitsonga Psalms 39 Bible Online

Psalms 39 - Xitsonga bible

Psalms 39

¹A ndzi ku: “Ndzi ta hitekela tindlela ta mina, Leswaku ndzi nga ti tshuka ndzi dyoha hi ririmi ra nga; Ndzi ta veka tomu enon'wini wa mina, Enkarhini lowu lowo biha a nga ta va kona emahlweni ka mina.”

²Ndzi tshama ndzi ri mbheveve, ndzi timiyelela; Ndzi titsona ku vulavula, ndzi vaviseka, Kambe nhlomulo wa mina wu engetekile.

³Mbilu ya mina a yi hiseka endzeni ka mina, Ndzilo wu tshiveriwe eku anakanyeni ka mina, Ku va laha ririmi ranga ri vulavulaka:

⁴“Yehovha! Ndzi tivise makumu ya vutomi byanga, Ni mpimo wa masiku ya mina, Ndzi ta tiva leswaku ndzi mukhaluti ntsena.”

⁵Waswivo, u pimile masiku ya mina, ma ringana xandla ntsena, Ni ku hanya ka mina a hi nchumu emahlweni ka wena. Kunene munhu un'wana ni un'wana la yimaka i hika ntsena.

⁶Kunene munhu wa fambafamba kukotisa ndzhuti, Va endla nkitsikitsi ku kuma swahava; U hlengeleta rifuwo, kambe a nga tivi la nga ta dya rona.

⁷Sweswi, Hosi, ndzi nga langutela yini xana? Ku tshemba ka mina ku le ka wena.

⁸Ndzi tshunxele eku dyoheni hinkwako ka mina! U nga ndzi veki xisandzu eka xihunguki!

⁹Ndzi miyerile, ndzi nga ahlamisi nomu, Hikuva hi wena la tirhaka.

¹⁰Tshika ku ndzi ba! Ndzi herile hikwalaho ka matimba ya voko ra wena.

¹¹Loko u laya munhu hikwalaho ka ku dyoha ka yena, U herisa swo saseka swa yena tani hi tinsumba. Kunene, munhu un'wana ni un'wana i hika ntsena.

¹²“Yehovha, yingisa xikhongelo xa mina, rhiyela ku huwelela ka mina ndleve! U nga miyeli loko ndzi rila; Hikuva ndzi muendzi eka wena, Ndzi muluveri kukota vatata wa mina hinkwavo.

¹³Wa nga ndzi fularhela leswaku ndzi tlhela ndzi kuma ku tsaka, Ndzi nga si tifambela, kutani ndzi nga ha vi kona.”