Read Xitsonga Psalms 4 Bible Online

Psalms 4 - Xitsonga bible

Psalms 4

¹Loko ndzi vitana, ndzi hlamule, wena; Xikwembu xa ku lulama ka mina! Loko ndzi ri emapfalweni, ndzi tshunxe! Ndzi tsetselele, u va u yingisa ku khongela ka mina.

²N'wina, vana va vanhu, xana mi ta hundzula ku vonakala ka mina xisandzu, Mi ta rhandza swahava, mi tiyisa vunwa, ku yisa kwihi-ke?

³Tivani leswaku Yehovha u tihlawulele munhu la khongelaka; Loko ndzi vitana ka yena, Yehovha wa ndzi yingisa.

⁴Rhurhumelani, mi nga tshuki mi dyoha; Mi vulavula hi timbilu loko mi etlela, kambe mi miyela.

⁵Humesani magandzelo ya ku lulama, Kutani mi titshembela Yehovha.

⁶Lavo tala va ku: “Hi ta kombiwa ku kateka hi mani? Oho Yehovha! Wa nga hi tsuvukisela ku vonakala ka mombo wa wena!”

⁷U tsakisile mbilu yanga ku tlurisa ku tsaka ka vona Loko va andzeriwa hi mavele ni vhinyo.

⁸Ndzi sivama, ndzi etlela hi ku rhula, Hikuva hi wena Yehovha u ri swaku la ndzi akisaka eku sasekeni.