Read Xitsonga Psalms 40 Bible Online

Psalms 40 - Xitsonga bible

Psalms 40

¹Ndzi langutele Yehovha hi ku tiyisela, Kutani u ndzi korhamele, a yingisa ku huwelela ka mina.

²U ndzi humesile ekheleni ra ku onhaka, ni le tshobyeni ra ndzhope; U vekile mikondzo ya nga eribyeni, a tiyisa ku famba ka mina.

³U nghenise enon'wini wa mina risimu lerintshwa, Ku dzunisa Xikwembu xa hina. Lavo tala va swi vonile va ve ni ku chava, Kutani va tshembile Yehovha.

⁴Ku katekile munhu la vekaka ku tshemba ka yena eka Yehovha, La nga hundzukeriki eka lava tikukumuxaka ni ka vahembi!

⁵Wena Yehovha, Xikwembu xanga, u andzisile ngopfu Masingita ni makungu ya wena ehenhla ka hina; Swa hi hlula ku ma hlaya emahlweni ka wena. Hambi ndzi rhandza ku ma hlaya ni ku ma vula, Ntsengo wa wona wu tlula leswi nga hlayiwaka.

⁶A ku tsakelangi magandzelo ni tinyiko; U pfurile tindleve ta mina. A ku lavanga holokosta ni magandzelo ya xidyoho.

⁷Kutani ndzi te: “Vona, ndzi tile Hi laha ku tsariweke hakona hikwalaho ka mina ebukwini.

⁸Xikwembu xanga, ndzi tsakela ku endla ku rhandza ka wena! Kutani nawu wa wena wu le mbilwini ya mina.”

⁹Ndzi twarisile ku lulama enhlengeletanweni leyikulu; Vona, a ndzi pfalanga milomu ya mina, Yehovha, wa swi tiva.

¹⁰A ndzi fihlanga ku lulama ka wena embilwini ya nga, Ndzi vurile ku tshembeka ka wena ni ku hlayiseka ka wena, A ndzi fihlelanga nhlengeletano leyikulu tintswalo ta wena, ni ku lulama ka wena.

¹¹Wena Yehovha u nga ka u nga ndzi aleli tintswalo ta wena! Musa wa wena ni ku lulama ka wena, swi ta ndzi hlayisa hi masiku.

¹²Hikuva makhombo lama nga hlayiwiki ma ndzi rhendzele; Milandzu ya mina yi ndzi khomile, ndzi hluleka ku yi vona; Yi tlula ntsengo wa misisi ya nhloko ya mina, Kutani ndzi heleriwa hi mbilu.

¹³Oho Yehovha, wa nga ndzi tshunxa! Oho Yehovha, hatlisa ku ta ndzi pfuna!

¹⁴A va kanakane, a va khomiwe hinkwavo hi tingana Lava lavaka vutomi bya mina ku byi susa; A va tlhelele endzhaku, a va khomiwe hi tingana, Lava tsakelaka ku onhaka ka mina!

¹⁵A va chavisiwe hi tingana ta vona Lava vulaka ehenhla ka mina: “Ha! Ha!”

¹⁶A va tsake, a va titsakele ha wena Hinkwavo lava ku lavaka! Lava rhandzaka ku hlayiseka ka wena, A va vule hi masiku, va ku: “A ku kurisiwe Yehovha!”

¹⁷Loko ndzi ri mina, ndzi xisiwana ni mupfumari; Kambe Hosi ya ndzi anakanya. U mupfuni wa nga ni mukutsuri wa nga: Xikwembu xa mina, u nga hlweri!