Read Xitsonga Psalms 42 Bible Online

Psalms 42 - Xitsonga bible

Psalms 42

¹Hi laha ntswele ya mhunti yi rilelaka mati ya milambu, Moya wa mina wu ku naverisa sweswo, wena Xikwembu!

²Moya wanga wu ni torha ra Xikwembu, ra Xikwembu lexi hanyaka. Ndzi ta ya rini, ndzi humelela emahlweni ka Xikwembu xana?

³Mihloti ya mina i swakudya swa mina nhlekanhi ni vusiku, Hi leswi va tshamaka va ku eka mina: “Xi kwihi Xikwembu xa wena?”

⁴Ndza xi anakanya, ni mbilu ya mina yi nyuka endzeni ka mina, Hi laha ingi ndzi tshamaka ndzi famba ni vunyingi, Ndzi byi fambisa, byi ya endlwini ya Xikwembu, Hi marito ya ku tsaka ni tinsimu ta ku khensa, Ta vunyingi lebyi nga enkhubyeni.

⁵Moya wanga, u hele ntamu ha yini, u tshukele yini endzeni ka mina? Tshemba Xikwembu, hikuva ndzi ta tlhela ndzi xi dzunisa; Hi xona ku hlayiseka ka mina ni Xikwembu xanga.

⁶Xikwembu xanga! Moya wa mina wu hele ntamu endzeni ka mina: Hikwalaho ndzi anakanya wena ndzi ri etikweni ra Yordani, Na Hermoni, ni le ntshaveni ya Mizara.

⁷Xidziva xi vitana xidziva xin'wana hi mpfumawulo wa maboboma ya wena. Magandlati ni maboboma hinkwawo ya wena ma hundzile henhla ka mina.

⁸Ninhlekanhi, Yehovha u ndzi ha tintswalo ta yena; Nivusiku, ndzi tshama ndzi yimbelela risimu ra yena, Ndzi khongela Xikwembu xa vutomi bya mina.

⁹Ndzi ku eka Xikwembu, ri nga ribye ra mina: “U ndzi rivele ha yini xana? Swi ndzi fanela ha yini ku famba hi xirilo, ndzi xanisiwa hi nala?”

¹⁰Marhambu ya mina ma tshove ka loko ndzi soriwa hi valala va mina, Loko va tshama va ku eka mina: “Xi kwihi, Xikwembu xa wena?”

¹¹Moya wa mina, u hele matimba ha yini, u tshukele yini endzeni ka mina? Tshemba Xikwembu, hikuva ndzi ta tlhela ndzi xi dzunisa; Hi xona ku hlayiseka ka mina ni Xikwembu xanga.