Read Xitsonga Psalms 45 Bible Online

Psalms 45 - Xitsonga bible

Psalms 45

¹Mbilu ya nga yi hisekela marito lamanene. Ndzi ku: “Ntirho wa mina i wa Hosi!” Ririmi ra nga i peni ya mutsari la tlhariheke.

²U tlula hi ku saseka vana va vanhu, Tintswalo ti halakile emilon'wini ya wena; Hikwalaho Xikwembu xi ku katekiseke hi laha ku nga heriki.

³We nhenha! Tibohe banga ra wena etsheveni ra wena! I ku dzuneka ka wena ni ku kwetsima ka wena;

⁴Khandziya golonyi ya wena u ya hlula, U ya lwela ntiyiso, ni ku lulama, ni musa. Voko ra wena ra xinene ri ta ku dyondzisa mitirho leyi chavisaka.

⁵Miseve ya wena yi kariha, Matiko ma ta wela ehansi ka wena, Miseve ya wena yi ta nghena etimbilwini ta valala va hosi!

⁶Oho Xikwembu! Xiluvelo xa wena xi tiyile hi mikarhi ni mikarhi; Nhonga ya vuhosi bya wena i nhonga ya ku lulama.

⁷U rhandza ku lulama, u venga swo biha; Hikwalaho, Xikwembu, Xikwembu xa wena Xi ku chelele hi mafurha ya ku tsaka exikarhi ka vanakuloni.

⁸Mirha, ni mhangani, ni kasiya swi le tingubyini ta wena hinkwato; Etindlwini ta ndlopfu, ku yimba ka magubu ku ku tsakisa.

⁹Vanhwanyana va tihosi va le xikarhi ka malandza ya wena. Nsati wa wena u tshamile evokweni ra wena ra xinene, U sasekisiwe hi nsuku wa Ofiri.

¹⁰Yingisa, wanhwana, languta u rhiya tindleve; Rivala tiko ra wena, ni yindlu ya tata wa wena,

¹¹Hosi yi ta navela ku saseka ka wena, Hikuva hi yena n'wini wa wena; u n'wi khinsamela.

¹²Wanhwana wa Tiri, ni vafumi va matiko, Va ta ku tsakisa hi mihlengo.

¹³Wanhwana wa hosi wa kwetsima swonghasi endlwini! Tinguvu ta yena ti lukiwe hi nsuku.

¹⁴U tisiwe ka hosi a ambale rhoko ya mavalavala. Endzhaku ka yena ku ta vanhwanakulobye va tisiwe ka wena;

¹⁵Va tisiwe hi ku tsaka ni ku yimbelela, Va nghena endlwini ya hosi.

¹⁶Vana va wena va ta tshama ematshan'weni ya vatata wa wena; U ta va veka tihosana emisaveni hinkwayo.

¹⁷Ndzi ta tsundzuxa vito ra wena etinxakeni hinkwato, Hikwalaho matiko ma ta ku dzunisa hi mikarhi leyi nga heriki.