Read Xitsonga Psalms 46 Bible Online

Psalms 46 - Xitsonga bible

Psalms 46

¹Xikwembu i vuchavelo bya hina ni matimba ya hina, I ku pfuna loku kumiwaka kusuhi emapfalweni.

²Hikwalaho a hi chavi nchumu loko misava yi hundzuluka, Ni loko tintshava ti tsekatseka exikarhi ka malwandle,

³Hambi magandlati ya wona ma pfuma, ma endla boboma, Hambi tintshava ti rhurhumela hikwalaho ka ku tlakuka ka wona.

⁴Wu kona nambu lowu mikhovotlo ya wona yi tsakisaka muti wa Xikwembu, Vukwetsimelo bya tindlu ta La nge henhlahenhla.

⁵Xikwembu xi le xikarhi ka wona, a wu tsekatsekisiwi; Xikwembu xi wu pfuna wa ha ri mixo.

⁶Matiko ma pfuma, tihosi ti huma nyimpi, Xi twarisa rito ra xona, kutani misava yi nyuka.

⁷Yehovha wa mavandla u na hina, Xikwembu xa Yakobo i xichavelo xa hina lexi tlakukeke!

⁸Tanani, mi hlalela mitirho ya Yehovha, Leswi a swi heriseke emisaveni.

⁹U herise tinyimpi ku yisa emakun'wini ya misava, U tshovile mavurha, u fayetele matlhari, U hise tigolonyi endzilweni.

¹⁰“Yimani, mi tiva leswaku ndzi Xikwembu; Ndzi tlakukile henhla ka matiko, ndzi tlakukile emisaveni!”

¹¹Yehovha wa tinyimpi u na hina, Xikwembu xa Yakobo i xichavelo xa hina lexi tlakukeke.