Read Xitsonga Psalms 48 Bible Online

Psalms 48 - Xitsonga bible

Psalms 48

¹Yehovha u nkulukumba, U faneriwe hi ku vongiwa hinkwako, Emutini wa Xikwembu xa hina, entshaveni ya xona ya ku kwetsima.

²Yi sasekile swonghasi ntshava ya Siyoni, yi tsakisa misava hinkwayo. Etlhelweni ra n'walungu, i muti wa hosi leyikulu;

³Etindlwini ta wona ta vuhosi Xikwembu xi tiviwa xi ri xichavelo lexi tlakukeke.

⁴Hikuva, vonani, tihosi ti hlanganile, ti hundzile swin'we;

⁵Ti wu vona, kutani ti hlamala, Ti tshuka, ti tsutsuma hi ku hatlisa.

⁶Ku rhurhumela ku ti khomile, Kukotisa ku vaviseka loku khomaka wansati loko a veleka.

⁷Hi mheho ya vuxa u tshovile tingalava ta Tarxixi.

⁸Leswi hi swi yingiseke, hi swi vonile Emutini wa Yehovha wa tinyimpi. Emutini wa Xikwembu xa hina: Xikwembu xi ta wu tiyisa hi laha ku nga heriki.

⁹Oho Xikwembu, hi anakanya tintswalo ta wena! Exikarhi ka tempele ya wena.

¹⁰Hi laha vito ra wena ri vongiwaka, oho Xikwembu! Swi tano ni ku dzuna ka wena ku yisa emakun'wini ya misava; Voko ra wena ra xinene ri tele ku lulama.

¹¹A yi tsake ntshava ya Siyoni! A va tsake vanhwanyana va Siyoni Hikwalaho ka ku avanyisa ka wena.

¹²Tsemakanyani exikarhi ka Siyoni, n'wi rhendzelekeni, Hlayani makhokholo ya wona,

¹³Langutisisani rirhangu ra wona, Mi kambisisa tindlu ta wona ta vuhosi, Mi ta ambela rixaka leri nga ta ta.

¹⁴Hikuva Xikwembu lexi, i Xikwembu xa hina hi laha ku nga heriki; Xi ta hi fambisa ku ya fika eku feni.