Read Xitsonga Psalms 56 Bible Online

Psalms 56 - Xitsonga bible

Psalms 56

¹Oho Xikwembu, ndzi twele vusiwana, hikuva vanhu va rhandza ku ndzi mita; Va lwa na mina siku hinkwaro, va ndzi xanisa.

²Hi siku hinkwaro valala va mina va lava ku ndzi mita; Hikuva va tele lava lwaka na mina hi ku tikurisa.

³Esikwini ra ku chava ka mina ndzi titshembela wena.

⁴Eka Xikwembu, ndzi ta twarisa rito ra xona; Ndzi tshemba Xikwembu, a ndzi chavi nchumu; Xana a nga ndzi endla yini la nga nyama ntsena?

⁵Hi siku hinkwaro, va onha marito ya mina; Loko va ndzi anakanya, i ku ndzi dyohela ntsena.

⁶Va hlengeletana, va rindza, va xiya mikondzo ya mina, Hikuva va lava ku susa vutomi bya mina.

⁷Xana va ta phonyoka hi ku homboloka xana? Oho Xikwembu, wisa vamatiko hi vukari bya wena!

⁸U tsala ku valanga hinkwako ka mina. Hlengeleta mihloti ya mina ekhuwaneni ra wena; A yi tsariwanga ebukwini ya wena xana?

⁹Valala va mina va ta tshinela endzhaku siku ndzi nga ta huwelela; Ndza swi tiva, hikuva Xikwembu xi na mina.

¹⁰Eka Xikwembu, ndzi ta twarisa rito ra xona; Eka Yehovha, ndzi ta twarisa rito ra yena.

¹¹Ndzi tshemba Xikwembu, a ndzi chavi nchumu; Vanhu va nga ndzi endla yini xana?

¹²Oho Xikwembu! Ndzi rhandza ku hetisa ku hlambanya ka mina eka wena; Ndzi ta ku humesela ku khensa.

¹³Hikuva u kutsurile moya wa mina eku feni, Ni mikondzo ya nga eku weni, Leswaku ndzi famba emahlweni ka Xikwembu, Eku vonakaleni ka lava hanyaka.