Read Xitsonga Psalms 58 Bible Online

Psalms 58 - Xitsonga bible

Psalms 58

¹Xana loko mi miyela, mi nga avanyisa hi ku lulama xana? Xana mi avanyisa hi ku lulama n'wina vana va vanhu-ke?

²E-e, etimbilwini ta n'wina, mi endla leswo homboloka; Etikweni, mi veka mitirho ya n'wina ya mahlundzu exikalweni.

³Lavo homboloka va hombolokile mpfhuka va tswariwa, Vahembi va hambukile mpfhuka va hume ekhwirini.

⁴Va ni vuxungu lebyi fanaka ni bya nyoka, Va fana ni mamba leyi nga yingisiki, leyi tisivaka tindleve,

⁵Leyi nga yingisiki rito ra vayimbeleri, Ni rito ra mungoma la tlhariheke ngopfungopfu.

⁶Oho Xikwembu! Tshova meno emilon'wini ya vona; Fayetela tinhlaya ta swinghalana, oho Yehovha!

⁷A va nyuke kukotisa mati lama khulukaka! A va cope miseve leyi tshoviweke ntsena!

⁸A va kotise holokompfa leyi nyukaka loko yi famba! A va kotise xiholoti xa wansati lexi nga vonangiki dyambu!

⁹Loko timbita ta n'wina ti nga si twa swigatlu, Leswa rihlaza kumbe leswa ku pfurha swi ta vutliwa hi xihuhuri.

¹⁰Lowo lulama u ta tsaka hi ku vona ku rihiseriwa; U ta hlantswa milenge ya yena engatini ya lavo biha.

¹¹Kutani vanhu va ta ku: “Kunene hakelo yi kona ya la lulameke, Kunene xi kona Xikwembu lexi avanyisaka emisaveni.”