Read Xitsonga Psalms 60 Bible Online

Psalms 60 - Xitsonga bible

Psalms 60

¹Oho Xikwembu, u hi cukumetile, u hi hangalasile, U karihile: hi pfuxe sweswi!

²U tsekatsekise misava, u yi handzurile: Horisa tinfa ta yona, hikuva ya dedeleka!

³U kombisile tiko ra wena swilo leswo nonon'hwa; U hi nwise vhinyo leyi pyopyisaka.

⁴U nyikile lava ku chavaka mfungho, Leswaku va pfuka hikwalaho ka vutshembeki bya wena.

⁵Ponisa hi voko ra wena, u hi hlamula, Leswaku varhandziwa va wena va lweriwa!

⁶Xikwembu xi vurile eku kwetsimeni ka xona xi ku: “Ndzi ta hlula, Ndzi ta avanyisa Xikeme, ndzi pima nkova wa Sukoti;

⁷Giliyadi i wa mina, Manase i wa mina; Efrayimi i khokholo ra nhloko ya mina, Yuda i nhonga ya mina ya vuhosi;

⁸Mowabu i nkambana lowu ndzi hlambelaka eka wona; Ndzi hoxa ntanghu ya mina ehenhla ka Edomu; Filista, huwelela hi ku tsaka ha mina!”

⁹I mani la nga ta ndzi fambisa emutini wa khokholo? I mani la nga ta ndzi fikisa eEdomu?

¹⁰Xana a hi wena Xikwembu lexi ngi u hi cukumetile, Wena Xikwembu lexi ngi u nga ha humi ni tinyimpi ta hina xana?

¹¹Hi pfune leswaku hi tiva ku huma emapfalweni, Hikuva ku pfuna ka munhu i swahava ntsena.

¹²Hi Xikwembu hi ta hlula. Hi xona lexi nga ta phyandlasa valala va hina.