Read Xitsonga Psalms 66 Bible Online

Psalms 66 - Xitsonga bible

Psalms 66

¹Tlakuselani eka Xikwembu ku huwelela ka ku tsaka, N'wina hinkwenu vaaki va misava!

²Yimbelelani ku kwetsima ka vito ra xona, Twarisani ku kwetsima ka xona hi ku xi dzunisa.

³Mi ku eka Xikwembu: “Mitirho ya wena yi chavisa swonghasi! Hikwalaho ka vukulu bya matimba ya wena, valala va wena va ku xengetela.

⁴Misava hinkwayo yi ta ku khinsamela; Yi ku yimbelela, yi yimbelela vito ra wena.”

⁵Tanani, mi vona mitirho ya Xikwembu; Xa chaviseka eku endleni ka xona ehenhla ka vana va vanhu;

⁶Xi hundzuluxile lwandle, ri va misava leya ku oma; Va perile nambu hi milenge: Ku va laha hi titsakelaka eka xona.

⁷Xi fuma hi matimba ya xona hi laha ku nga heriki; Mahlo ya xona ma langutisa matiko. Lava tiarisaka va nga tshuki va tikurisa.

⁸N'wina matiko, vongani Xikwembu xa hina! Twarisani rito ra ku dzuna ka xona!

⁹Xi hanyisile mimoya ya hina, A xi pfumelanga leswaku milenge ya hina yi khunguvanyeka.

¹⁰Hikuva wena, Xikwembu, u hi ringile! U hi nyukisile exirhengeleni kukotisa silivhere.

¹¹U hi kokerile enkukutweni, U vekile ndzhwalo lowo tika eswifungheni swa hina;

¹²U khandziyisile vanhu etinhlokweni ta hina; Hi hundzile exikarhi ka ndzilo ni mati. Kambe u hi humesile erivaleni ni le ndzalweni.

¹³Ndzi ta nghena endlwini ya wena hi tiholokosta, Ndzi ku rihela leswi ndzi ku hlambanyeleke,

¹⁴Leswi humeke emilon'wini ya mina, Leswi vuriweke hi nomu wanga emapfalweni ya mina.

¹⁵Ndzi ta ku humesela tiholokosta ta tinyimpfu leti noneke, Swin'we ni mafurha ya makhuna, Ndzi ta tlhava tinkunzi ni swiphongo.

¹⁶Tanani, yingisani n'wina hinkwenu lava chavaka Xikwembu, Ndzi ta vula leswi xi swi endleleke moya wa mina.

¹⁷Ndzi xi vitanile hi nomu wa mina, Ndzi xi twarisile hi ririmi ra nga.

¹⁸Loko a ndzi anakanyile ku homboloka embilwini ya mina, Hosi a yi nga ta ndzi yingisanga,

¹⁹Kambe kunene Xikwembu xi ndzi yingisile, Xi rhiyele rito ra ku khongela ka mina ndleve.

²⁰A ku vongiwe Xikwembu lexi nga cukumetangiki xikhongelo xa mina, Lexi nga ndzi tekelangiki tintswalo ta xona!