Read Xitsonga Psalms 68 Bible Online

Psalms 68 - Xitsonga bible

Psalms 68

¹Xikwembu a xi pfuke, valala va xona a va hangalake, Ni lava xi vengaka a va tsutsume emahlweni ka xona.

²Hi laha musi wu nyumbaka hakona va nyumbisa sweswo, Hi laha mupfu wu nyukaka endzilweni, Lavo biha va ta lovisa sweswo emahlweni ka Xikwembu.

³Kambe lavo lulama va ta tsaka, va khana emahlweni ka Xikwembu, Va tsakisisa ngopfu.

⁴Yimbelelani Xikwembu, dzunisani vito ra xona, Lunghiselani loyi a fambaka exikarhi ka mananga endlela! Yehovha i vito ra yena; tsakani emahlweni ka yena!

⁵Tatana wa swisiwana ni muyimeri wa tinoni, Hi lexi Xikwembu xi nga xona endlwini leyo kwetsima ya xona.

⁶Xikwembu xi akisa endlwini lava tshikiweke; Xi humesa lava bohiweke xi va veka endzalweni; Kambe lava tiarisaka va tshama ematikweni ya ku oma.

⁷Oho Xikwembu! Loko u humile emahlweni ka tiko ra wena, Loko u tsemakanya mananga,

⁸Misava ya tsekatseka, na wona matilo ma nyuka emahlweni ka Xikwembu, Sinayi loyi a tsekatseka emahlweni ka Xikwembu, Xikwembu xa Israele.

⁹Oho Xikwembu! U nisile mpfula ya ku kateka ehenhla ka ndzhaka ya wena, Ni loko yi karhele, u yi hile matimba.

¹⁰Ntlhambi wa wena wu akile etikweni leri; Hi tintswalo ta wena, oho Xikwembu! U ri lunghisele swisiwana.

¹¹Hosi yi letele rito, Kutani vavasati lavo tala va vika mahungu lamanene,

¹²Tihosi ta tinyimpi ti tsutsuma, ti tsutsuma, Kutani wansati la langutelaka yindlu u averiwa xuma.

¹³Loko mi ri karhi mi wisa exikarhi ka matshanga, A mi fana ni tuva leri nga ni timpapa leti namekiweke hi silivhere; Tinsiva ta rona ta hatima kukotisa nsuku.

¹⁴Siku La nga ni matimba hinkwawo a hangalaseke tihosi etikweni, Misava yi basa [hi marhambu] kukotisa gamboko ehenhla ka Salimoni.

¹⁵Ntshava ya Xikwembu, yi kona le Baxani, I ntshava ya tinhlohlorhi leto tala, i ntshava ya le Baxani.

¹⁶Xana n'wina tintshava leta tinhlohlorhi to tala, mi rindzela yini Ntshava leyi Xikwembu xi yi hlawuleke ku va xitshamo xa xona xana? Kunene Yehovha u ta tshama kona hi laha ku nga heriki.

¹⁷Tigolonyi ta Xikwembu i ya madzana mambirhi ya madzana, I makume ya madzana ni ya madzana; Hosi yi le xikarhi ka wona, i Sinayi ya ku kwetsima.

¹⁸U tlhandlukele ehenhla, u yise vakhomiwa, U tekile tinyiko exikarhi ka vanhu, Ni le xikarhi ka lava tiarisaka, Leswaku ku va ni vuako bya Yehovha Xikwembu exikarhi ka vona.

¹⁹A ku khensiwe Hosi leyi rhwalaka mirhwalo ya hina hi masiku, Xona Xikwembu lexi hi hlayisaka.

²⁰Xona Xikwembu, hi xona lexi nga ni matimba ya ku hi ponisa, Hi yena Yehovha, Hosi ya hina, la tivaka ku hi humesa eku feni.

²¹Kunene Xikwembu xi ta faya tinhloko ta valala va xona, Ni ripala leri nga ni misisi ra lava hanyaka eku dyoheni ka vona.

²²Hosi yi te: “Ndzi ta va tlherisa va pfa eBaxani; Ndzi va humesa exidziveni xa lwandle,

²³Leswaku u peta nenge wa wena engatini, Ni leswaku ririmi ra timbyana ta wena ri averiwa swa valala.”

²⁴Va hlalela ku famba ka wena Xikwembu! Ku famba ka Xikwembu xanga, eka hosi ya mina evukwetsimelweni.

²⁵Vayimbeleri va rhanga emahlweni ndzhaku ku famba lava yimbaka hi magubu, Exikarhi ka vanhwanyana lava yimbaka hi mirumba.

²⁶“Khensani Xikwembu etinhlengeletanweni, Khensani Hosi, n'wina va rixaka ra Israele!”

²⁷Kona ku na Benjamini lontsongo, loyi a va fumaka, Ni tihosi ta Yuda ni vandla ra tona, Ni tihosi ta Zebuloni, ni tihosi ta Neftali.

²⁸Xikwembu xa wena xi lerisa leswaku u va ni matimba; Tiyisa Xikwembu, ntirho lowu u hi endleleke wona!

²⁹Etempeleni ya wena leyi tlakukeke ehenhla ka Yerusalema, U ta amukela tinyiko ta tihosi.

³⁰Tshinya xiharhi lexi nga enhlangeni, Ntlhambi wa tinkunzi, kun'we ni marhole ya vamatiko, Va ta khinsama ni xuma xa silivhere. Hangalasa matiko lama rhandzaka ku lwa!

³¹Tihosi letikulu ti ta ti pfa eEgipta; Etiyopiya a angwetla a tshambuluta mavoko eka Xikwembu.

³²N'wina matiko ya misava, tlangelani Xikwembu, Twarisani Hosi hi tinsimu.

³³Hi yena la taka ematilweni, ematilweni lama nga riki na makumu! Vonani, u twarisa rito ra yena, rito ra matimba,

³⁴Nyikani Xikwembu matimba! Ku kwetsima ka xona ku le henhla ka Israele, matimba ya xona ma le mapapeni.

³⁵Wa chaveka, oho Xikwembu! Exikarhi ka vukwetsimelo bya wena. Xikwembu xa Israele, hi xona lexi nyikaka tiko ra xona matimba ni ku fuma. A ku khensiwe Xikwembu!