Read Xitsonga Psalms 7 Bible Online

Psalms 7 - Xitsonga bible

Psalms 7

¹Yehovha, Xikwembu xa mina, ndzi chavela ka wena; Ndzi ponise ka hinkwavo lava ndzi xanisaka, u ndzi londzovota,

²Leswaku nala a nga tshuki a ndzi handzula kukotisa nghala, A ndzi khandletela loko ndzi nga ri na mulweri.

³Yehovha, Xikwembu xa mina! Loko ndzi endlile xin'wana, Loko ku homboloka ku kona emavokweni ya mina;

⁴Loko ndzi rihele la nga hanya hi ku rhula na mina, swo biha, Loko ndzi phangile la ndzi vengeke ntsena,

⁵Nala a a ndzi hlongorise, a ndzi khoma, A kandziyela vutomi bya mina ehansi, Kutani a etlerisa ku kwetsima ka mina entshurini!

⁶Pfuka, Yehovha, evukarini bya wena, U pfukela ku leva ka lava nga valala eka mina, Pfuka ku ndzi yimela, u lerisa ku avanyisa!

⁷Nhlengeletano ya matiko a yi ku rhendzele! U khandziya endhawini leyi tlakukeke, u va ungamela!

⁸Yehovha a a avanyise matiko; Oho Yehovha! U ndzi lunghisela! Leswaku ndzi endliwa hi ku lulama ni ku tenga ka mina.

⁹Herisa lunya ra lavo homboloka, Kambe u tiyisa la lulameke, Wena la kambaka timbilu ni swisuti, oho Xikwembu xo lulama!

¹⁰Xitlhangu xa mina xi le ka Xikwembu, Lexi lwelaka lava timbilu to lulama.

¹¹Xikwembu i muavanyisi la lulameke; I Xikwembu lexi karihelaka lavo biha hi masiku hinkwawo.

¹²Loko lowo biha a nga hundzuki, xi ta lota tlhari ra xona; Xi kungile vurha bya xona, xi byi rhiyile;

¹³Xi n'wi copa hi miseve leyi dlayaka, Hi miseve leyi a yi pfurhisaka.

¹⁴Maswivo, lowo biha a tilunghisela swo biha ntsena; A xurhe swona exifuveni, kutani a tswala swahava.

¹⁵A cela rindzi a ri hakuta, Kambe a wela erindzini leri a ri celeke.

¹⁶Mano ya yena ma ta wela enhlokweni ya yena, Ni ku kariha ka yena ku ta wela emombyeni wa yena.

¹⁷Ndzi ta dzunisa Yehovha hikwalaho ka ku lulama ka yena, Ndzi ta yimbelela vito ra Yehovha la nge henhlahenhla.