Read Xitsonga Psalms 72 Bible Online

Psalms 72 - Xitsonga bible

Psalms 72

¹Oho Xikwembu! Nyika hosi swiavanyiso swa wena, Ni ku lulama ka wena eka n'wana wa hosi,

²U ta avanyisa tiko ra wena hi ku lulama, Ni va wena lava xanisekaka, u ta va avanyisa hi mfanelo.

³Tintshava ti ta vuyisa ku rhula eka vanhu, Ni switsunga mikarhi ya ku lulama.

⁴Yi ta avanyisa timhaka ta swisiwana swa tiko hi ku lulama, Yi ta ponisa vana va mupfumari, Kambe yi ta phyandlasa muxanisi.

⁵Va ta ku chava loko dyambu ni n'weti swa ha ri kona, Etinxakeni ta tinxaka.

⁶Yi ta fana ni mpfula loko yi na emadyelweni, Yi kotisa mberha leyinene leyi tsakamisaka misava.

⁷Emasikwini ya yona, lowo lulama u ta hluka; Ni ku rhula ku ta andza, n'weti wu ko wu nga ha ri kona.

⁸Yi ta fuma ku sukela elwandle rin'wana ku ya fika eka rin'wana, Ni ku sukela enambyeni, ku ya fika emakun'wini ya misava.

⁹Lava tshamaka emananga va ta khinsama emahlweni ka yona, Ni valala va yona va ta nantswa ntshuri.

¹⁰Tihosi ta le Tarxixi ni ta swihlale ti ta tisa ndzuvo, Tihosi ta le Xeba ni ta Seba ti ta humesa tinyiko;

¹¹Tihosi hinkwato ti ta khinsama emahlweni ka yona, Matiko hinkwawo ma ta yi tirhela.

¹²Hikuva yi ta tshunxa xisiwana loko xi huwelela, Ni la nga enhlomulweni, la nga riki na mupfuni.

¹³Yi ta tsetselela xisiwana ni la nga ekhombyeni, Kutani yi ta kutsula vutomi bya swisiwana.

¹⁴Yi ta kutsula mimoya ya vona eku xanisiweni ni le ku vutleriweni, Ngati ya vona yi ta va ni risima emahlweni ka vona.

¹⁵Vona va ta hanya, va ta yi nyika nsuku wa Xeba; Va ta yi khongelela hi mikarhi hinkwayo, ni ku yi katekisa hi masiku.

¹⁶Ku ta va ni ndzalo ya koro la emisaveni ni le tihlohlorini ta tintshava, Mitshetsho ya rona yi ta hlakahla kukotisa mirhi ya Lebanoni; Lava akeke emitini va ta rhumbuka kukotisa byanyi bya misava.

¹⁷Vito ra yona ri ta tshama hi laha ku nga heriki, Vito ra yona ri ta va kona hi laha dyambu ri nga ta va kona. Vanhu va ta katekisana ha yona, Matiko hinkwawo ma ta yi vula la katekeke.

¹⁸A ku khensiwe Yehovha, Xikwembu xa Israele, La endlaka swihlamariso a ri swakwe!

¹⁹A ku khensiwe vito ra yena ra ku kwetsima! Misava hinkwayo a yi tatiwe hi ku twala ka yena. Amen! Ina! Amen!

²⁰Swikhongelo swa Davhida, n'wana Yese, swi herile kutani.