Read Xitsonga Psalms 79 Bible Online

Psalms 79 - Xitsonga bible

Psalms 79

¹Oho Xikwembu, va matiko va nghene endzhakeni ya wena, Va nyamisile tempele ya wena leyi kwetsimaka, Va endle Yerusalema, marhumbi.

²Va nyikete tinyanyana ta matilo mitsumbu ya malandza ya wena, Ni swivandzana swa misava tinyama ta varhandziwa va wena.

³Va halate ngati ya vona tani hi mati Matlhelo hinkwawo ya Yerusalema, Kutani ku pfumaleka lava va lahlaka.

⁴Hi hundzukile xisandzu eka lava akisaneke na hina, Ku tlanga, ni xihlekiso xa lava nga ematlhelweni.

⁵Yehovha, u ta tshika rini ku kariha, Rilondo ra wena ri ta pfurha tani hi ndzilo hi masiku xana?

⁶Halatela vamatiko lava nga ku tiviki vukari bya wena, Ni matiko hinkwawo lama nga khongeriki vito ra wena.

⁷Hikuva va dyile Yakobo, Va onhile vuako bya yena.

⁸U nga tshuki u anakanya vudyohi bya vatata wa hina! Tintswalo ta wena a ti hi tele hi ku hatlisa! Hikuva hi va makhombo ngopfu.

⁹Oho Xikwembu xa ku hlayiseka ka hina, u hi pfuna, Hikwalaho ka ku kwetsima ka vito ra wena, U hi hlayisa, u hi rivalela vudyoho bya hina, Hikwalaho ka vito ra wena!

¹⁰Matiko ma vulela yini ma ku: “Xikwembu xa vona xi kwihi?” Ku rihisa ka ngati ya malandza ya wena, leyi halatiweke, A ku vonakale ematikweni emahlweni ya hina.

¹¹Ku talelwa ka mbilu ya vakhomiwa a ku fike emahlweni ka wena, U hlayisa lava averiweke ku fa, hi matimba ya voko ra wena!

¹²Hosi, u tlherisela eka ntlhanu na kambirhi exifuveni xa lava akisaneke na hina, Xisandzu lexi va ku sandzeke ha xona!

¹³Kutani hina, tiko ra wena, ntlhambi lowu u wu risaka, Hi ta ku khensa hi laha ku nga heriki, Ni vatukulu va hina, va ta tama va vula ku dzuneka ka wena.