Read Xitsonga Psalms 80 Bible Online

Psalms 80 - Xitsonga bible

Psalms 80

¹Rhiya ndleve, murisi wa Israele, Wena la fambisaka Yosefa, tani hi ntlhambi, Wena la tshamaka exikarhi ka tikerubu, Humelela eku vonakaleni ka wena!

²Pfuxa vunhenha bya wena emahlweni ka Efrayimi, na Benjamini, na Manase. Kutani u ta hi pfuna.

³Oho Xikwembu, u tlhela u hi akisa, U vonakisa mombo wa wena kutani hi ta ponisiwa!

⁴Yehovha, Xikwembu xa tinyimpi! U ta karihela ku khongela ka tiko ra wena ku yisa kwihi?

⁵U ri phamela vuswa bya mihloti, Kutani u va nwisa mihloti hi mpimo lowukulu.

⁶U hi endlile lava tengiwaka hi lava akisaneke na hina, Kutani valala va hina va hi endlile xisandzu.

⁷Oho! Xikwembu xa tinyimpi, u tlhela u hi akisa, U vonakisa mombo wa wena, kutani hi ta ponisiwa.

⁸U tsuvule vhinya etikweni ra Egipta, U hlongorile matiko, kutani u yi simeka.

⁹U yi lunghisela misava, Kutani yi nava timitsu, yi tata tiko,

¹⁰Tintshava ti khubumetiwa hi ndzhuti wa yona, Kutani marhavi ya yona ma ve tani hi tikedari ta Xikwembu.

¹¹Marhavi ya yona ma nava ku yisa elwandle, Ni mahluke ya yona ku yisa enambyeni.

¹²Xana u hahlulele yini rihlampfu ra yona, Leswaku yi ta tshoveriwa hi vahundzi hinkwavo,

¹³Yi tshoveleriwa hi tinguluve ta xihlahla, Kutani swiharhi swa nhova swi tele ku ta dya kona?

¹⁴Oho vuya, Xikwembu xa tinyimpi! Languta, u ri etilweni, kutani u vona! U xiya vhinya leyi, u yi hlayisa!

¹⁵U sirheleta lexi voko ra wena ra xinene ri xi simekeke, Ni n'wana loyi u tikuriseleke yena!

¹⁶Yi tshwile hi ndzilo, yi tsemiwile Va hela hi ku tshinya ka mombo wa wena.

¹⁷Sirheleta munhu, wu nga ntirho wa voko ra wena ra xinene, Ni n'wana wa munhu loyi u tihlawuleleke yena!

¹⁸Hi laha hi nga taka hi nga ha ku tshiki; U engeta u hi hanyisa, kutani hi ta khongela vito ra wena!

¹⁹Yehovha, Xikwembu xa tinyimpi, hi pfuxe! U vonakisa mombo wa wena, kutani hi ta ponisiwa!