Read Xitsonga Psalms 81 Bible Online

Psalms 81 - Xitsonga bible

Psalms 81

¹Twarisani tinsimu ta n'wina eka Xikwembu lexi nga matimba ya hina, Mi huwelela hi ku tsaka eka Xikwembu xa Yakobo!

²Tlakusani tinsimu ta n'wina, mi ba mirumba, Ni timbila leto nandziha, ni magubu!

³Hi n'weti lowuntshwa, yimbani nanga, Ni loko n'hweti wu be mahlampfu, hi siku ra nkhuvo wa hina!

⁴Hikuva i nawu lowu nyikiweke Israele, I ku lerisa ka Xikwembu xa Yakobo;

⁵I vumbhoni lebyi tiyisiweke eka Yosefa, Siku xi hlaselaka Egipta; Laha ndzi nga twa ku vulavula loku ngi ndzi nga ku tivi.

⁶Ndzi rhula nhundzu ekhatleni ra yena, Mavoko ya yena ma tshika xirhundzu.

⁷U ndzi khongele u ri emapfalweni, kutani ndzi ku ponisa, Ndzi ku hlamule ndzi titumbetile eku pfumeni, Kutani ndzi ku ringa ematini ya Meriba.

⁸Yingisa tiko ra mina, ndzi ku hlamusela; Oho Israele, loko swange u nga ndzi yingisa!

⁹Ku nga tshuki ku va ni xikwembu ximbe eka wena, U nga tshuki u khinsamela swikwembu swa matiko.

¹⁰Hi mina Yehovha, Xikwembu xa wena, la ku humeseke etikweni ra Egipta! Ahlamisa nomu wa wena, ndzi ta wu tata.

¹¹“Kambe tiko ra mina a ri yingisanga rito ra mina, Israele a nga ndzi yingisanga.

¹²Hi laha ndzi va tshikeke eku tiariseni ka timbilu ta vona, Va landzela switsundzuxo leswi nga swa vona ...

¹³Oho! Loko ngi tiko ra mina ra ndzi yingisa, Loko ngi Israele u famba etindleleni ta mina,

¹⁴A ndzi ta hatlisa ku tsongahata valala va vona, A ndzi ta hundzula voko ra mina eka vakaneti va vona;

¹⁵Lava vengaka Yehovha, a va ta titsongahata emahlweni ka yena, Nkarhi wa ku kateka ka vona a wu ta va lowu nga heriki,

¹⁶A ndzi ta va phamela hi mavele lamanene, Ndzi va xurhisa hi vulombe bya le ribyeni.”