Read Xitsonga Psalms 89 Bible Online

Psalms 89 - Xitsonga bible

Psalms 89

¹Ndzi ta yimbelela tintswalo ta Yehovha hi masiku; Milomu ya mina yi ta tivisa ku tshembeka ka wena hi laha ku nga heriki.

²Hikuva ndzi ku: “Vunene bya wena byi ni masungulo lama nga heriki: U vekile ku tshembeka ka wena le tilweni.”

³U te: “Ndzi endlile ntwanano ni muhlawuriwa wa mina; Ndzi hlambanyile eka Davhida, nandza wa mina,

⁴Ndzi ku: ‘Ndzi ta tiyisa rixaka ra wena hi masiku ni masiku, Ndzi ta tiyisa xiluvelo xa wena hi laha ku nga heriki.’ ”

⁵Matilo ma dzunisa masingita ya wena, oho Yehovha! Ndzi vutshembeki bya wena enhlengeletanweni ya vakwetsimi.

⁶Hikuva i mani, le tilweni, la nga tiringanisaka na Yehovha? Exikarhi ka vana va Xikwembu, i mani la fanaka na Yehovha?

⁷Xikwembu xa chavisa enhlengeletanweni leyikulu ya vakwetsimi, Xi chaviwa hi ku tlurisa hi lava xi rhendzeleke.

⁸Oho Yehovha, Xikwembu xa tinyimpi, i mani la fanaka, na wena hi matimba? Ku tshembeka ka wena ku ku rhendzela hi matlhelo hinkwawo.

⁹U fuma ku tikukumuxa ka lwandle; Loko magandlati ma pfuka wa ma miyeta.

¹⁰U phyandlasile Egipta kukota munhu la feke, U hangalasile valala va wena hi matimba ya voko ra wena,

¹¹Tilo ni misava i swa wena, U tumbuluxile misava ni swilo hinkwaswo swa yona.

¹²U endlile n'walungu ni dzonga; Taboro na Hermoni swi dzunisa vito ra wena.

¹³Matimba ma le vokweni ra wena, Xandla xa wena xa xinene xi tiyile, xi tlakukile.

¹⁴Ku lulama ni ku avanyisa i masungulo ya xiluvelo xa wena, Tintswalo ni vunene swi le mahlweni ka mombo wa wena.

¹⁵Ku katekile tiko leri tivaka mpfumawulo wa nanga! Ri famba eku vonakaleni ka mombo wa wena, Yehovha.

¹⁶Masiku hinkwawo ri tsakela vito ra wena, Ri tidzunisa hi ku lulama ka wena.

¹⁷Hikuva u ku kwetsima ka matimba ya rona. Hi tintswalo ta wena, u tlakusa rimhondzo ra hina,

¹⁸Hikuva xitlhangu xa hina i Yehovha, Mukwetsimi wa Israele i Hosi ya hina.

¹⁹Khale u vurile enorhweni eka Muhlawuriwa wa wena U ku: “Ndzi pfunile nhenha, Ndzi wundlile jaha exikarhi ka tiko.

²⁰Ndzi kumile Davhida, nandza wa mina, Ndzi n'wi cherile hi mafurha ya mina layo kwetsima.

²¹Voko ra mina ri ta n'wi akisa, Voko ra mina ri ta n'wi tiyisa.

²²Nala a nga ka a nga n'wi wongi, Mukanganyisi a nga ka a nga n'wi xanisi.

²³Ndzi ta pukutsa emahlweni ka yena vakaneti va yena, Ndzi ta ba lava n'wi vengaka.

²⁴Ku tshembeka ka mina ni vunene bya mina swi ta va na yena, Matimba ya yena ma ta tiyisiwa hi vito ra mina.

²⁵Ndzi ta veka voko ra yena henhla ka lwandle, Ni ra xinene ra yena ehenhla ka milambu.

²⁶Yena u ta ndzi khongela, a ku: ‘Hi wena tatana, Xikwembu xanga ribye ra ku hlayiseka ka mina!’

²⁷Mina ndzi ta n'wi endla mativula ya mina, La tlulaka tihosi hinkwato ta misava.

²⁸Ndzi ta n'wi hlayisela vunene bya mina hi masiku; Ntwanano wa mina na yena wu ta tiya hi masiku.

²⁹Rixaka ra yena ri ta va leri nga heriki; Xiluvelo xa yena xi ta tiya tani hi masiku ya matilo.

³⁰“Kungakuloko vana va yena va tshika nawu wa mina, Va nga fambi eku leriseni ka mina,

³¹Loko va tlula milawu ya mina, Va nga hlayisi ku lerisa ka mina,

³²Ndzi ta ba hi nkhavi ku dyoha ka vona, Ndzi ba ku homboloka ka vona hi ntshilana;

³³Kambe ndzi nga ka ndzi nga n'wi tekeri vunene bya mina, Ndzi nga ka ndzi nga hundzuluxi ku tshembeka ka mina mavunwa.

³⁴Ndzi nga ka ndzi nga onhi ntwanano wa mina, Ni ku hundzuluxa rito leri nga huma emilon'wini ya mina.

³⁵“Ndzi hlambanyile kan'we hi ku kwetsima ka mina; Xana ndzi ta hembela Davhida-ke?

³⁶Rixaka ra yena ri ta va kona hi laha ku nga heriki. Xiluvelo xa yena xi ta va kona emahlweni ka mina tani hi dyambu,

³⁷Xi ta tiyisiwa hi mikarhi, tani hi n'weti. Mbhoni leyi nga ematilweni ya tshembeka.”

³⁸Hambiswiritano, u cukumetile muhlawuriwa wa wena, U n'wi tshikile u n'wi karihele.

³⁹U nyenyile ntwanano lowu u wu endleke ni nandza wa wena, U sandzile harhi ya yena, u yi cukumete hansi,

⁴⁰U mbundzumuxile rirhangu hinkwaro ra yena. U endlile makhokholo ya yena marhumbi.

⁴¹Vahundzi hinkwavo va yiva swa yena; U endliwile xisandzu eka vanakulobye.

⁴²U tlakusile voko ra xinene ra vaxanisi va yena; U tsakisile vavengi hinkwavo va yena.

⁴³U bvinyile ku kariha ka tlhari ra yena; A ku n'wi tiyisanga eku lweni.

⁴⁴U herisile ku kwetsima ka yena; U mbundzumuxile hansi xiluvelo xa yena.

⁴⁵U komisile masiku ya vuntshwa bya yena, U n'wi khomisile tingana.

⁴⁶Oho Yehovha, u ta tifihla ku yisa kwihi? Vukari bya wena byi ta pfurha tani hi ndzilo ku fika kwihi?

⁴⁷Anakanya vutomi bya mina, leswaku byi komile, Ni leswaku u endlele swahava vana hinkwavo va vanhu.

⁴⁸U kwihi munhu la hanyaka, a nga tiki vona rifu xana? U kwihi la nga kutsulaka moya wa yena exivandleni xa vafi-ke?

⁴⁹Oho Yehovha, ti kwihi tintswalo ta wena leto sungula, Leti u nga hlambanyela Davhida ha tona hi ku tshembeka ka wena?

⁵⁰Oho Yehovha, anakanya tingana ta malandza ya wena, Ni leswaku ndzi rhwala exifuveni xa mina xisandzu xa matiko layo tala.

⁵¹Oho Yehovha, anakanya swisolo swa valala va wena! Xisolo lexi va solaka mitila ya muhlawuriwa wa wena ha xona.

⁵²A ku khensiwe Yehovha hi masiku! Amen! Amen!