Read Xitsonga Psalms 9 Bible Online

Psalms 9 - Xitsonga bible

Psalms 9

¹Ndzi ta dzunisa Yehovha hi mbilu hinkwayo ya mina, Ndzi ta vula mahlori ya wena hinkwawo.

²Ndzi ta tsaka, ndzi titsakela ha wena; Ndzi ta yimbelela vito ra wena la nge henhlahenhla.

³Valala va mina va tlhelele endzhaku, Va khunguvanyeka, va lova emahlweni ka wena.

⁴Hikuva u yimele timhaka ta mina ni timfanelo ta mina; U tshamisile exiluvelweni xa wena, u ri muavanyisi la lulameke.

⁵U tshinya vamatiko, u lovisa lavo homboloka, U hlangula mavito ya vona hi masiku, hilaha ku nga heriki.

⁶Valala va herisiwile; ku onhaka ka vona ku herile. U onhile miti ya vona; ni vito ra vona ri herile na vona.

⁷Kambe Yehovha u fuma hilaha ku nga heriki, U tilunghisele xiluvelo xa ku avanyisa;

⁸U ta avanyisa misava hi ku lulama, A nyiketa matiko eku avanyiseni loku lulameke.

⁹Yehovha i xichavelo xa la xanisekaka, I xichavelo xa yena enkarhini wa mahlomulo.

¹⁰Lava tivaka vito ra wena va titshembisa ha wena; Hikuva wena Yehovha, a ku tshiki lava ku lavaka.

¹¹Yimbelelani Yehovha la tshamaka Siyoni, Byelani matiko mitirho leyikulu ya yena.

¹²Hikuva murihiseri wa ngati u anakanya lava nga ekhombyeni, A nga rivali ku huwelela ka lava nga ni nhlomulo.

¹³Ndzi twele vusiwana, oho Yehovha! Languta khombo leri ndzi nga ka rona hikwalaho ka lava ndzi vengaka, Wena la ndzi humesaka etinyangweni ta rifu;

¹⁴Leswaku ndzi twarisa tinsimu ta wena hinkwato, Etinyangweni ta wanhwanyana wa Siyoni, Kutani ndzi ta tsakela ku hlayiseka ka wena.

¹⁵Matiko ma wile erindzini leri ma ri celeke; Milenge ya vona yi phasiwile entlhan'wini lowu va wu fihleke.

¹⁶Yehovha u tikombisile, u lulamisile timhaka, U phasile mudyohi hi mitirho ya mavoko ya yena.

¹⁷Lavo homboloka va ta tlhelela exivandleni xa vafi, Ni matiko hinkwawo lama rivalaka Xikwembu.

¹⁸Hikuva xisiwana xi nga ka xi nga rivariwi hi masiku, Kambe ku langutela ka lava nga ekhombyeni, ku nga ka ku nga lovi hi laha ku nga heriki.

¹⁹Pfuka, Yehovha, leswaku munhu a nga tshuki a tiha matimba, Matiko a ma avanyisiwe emahlweni ka wena!

²⁰Yehovha, chela nchavo exikarhi ka wona! Matiko a ma tivisise leswaku i vanhu ntsena!