Read Xitsonga Psalms 90 Bible Online

Psalms 90 - Xitsonga bible

Psalms 90

¹Oho, Yehovha, a wu ri xichavelo xa hina etinxakeni ta tinxaka.

²Loko tintshava ti nga si tumbuluka, Loko u nga si vumba misava, ni swilo hinkwaswo, Hi mikarhi ni mikarhi, u Xikwembu.

³U tlherisa vanhu entshurini, U ku: “Tlhelani, n'wina vana va vanhu!”

⁴Hikuva khume ra madzana ya malembe emahlweni ka wena, Ma fana ni siku ra tolo, loko ri hundzile, Ni lavelelo ya vusiku.

⁵U va kukuta, va fana ni norho, Nimixo va hluka kukota byanyi:

⁶Nimixo, byi hluka byi rhumbuka, Nimadyambu, byi tsemiwa, byi vuna.

⁷Hikuva hi herisiwa hi vukari bya wena, Ku hlundzuka ka wena ku hi chavisa.

⁸U vekile emahlweni ka wena swivi swa hina, Ni ku dyoha ka hina loku fihliweke ku le ku vonakaleni ka mombo wa wena.

⁹Masiku hinkwawo ya hina ma hundza hi vukari bya wena; Malembe ya hina ma nyumba kukotisa mpfumawulo.

¹⁰Masiku ya ku hanyaka hina, ma ringana malembe ya 70, Ni ka lava tiyeke, ma fika ka malembe ya 80; Kutani ku tidzunisa loku va ku kumaka ka wona i ku vaviseka ni gome, Hikuva ha hatla ku hundza, kambe hi tihahela!

¹¹I mani la tsundzukaka matimba ya vukari bya wena, Ni ku hlundzuka ka wena hi ku chavisa loku ku fanelaka!

¹²Hi dyondzise ku hlaya swinene masiku ya hina, Leswaku timbilu ta hina ti tsundzukela evutlharini.

¹³Vuya, Yehovha! U ta hlwela ku yisa kwihi? U va u tsetselela malandza ya wena!

¹⁴Hi xurhise hi vunene bya wena, wa ha ri mixo, Kutani hi ta tsaka, hi va hi tsakisisa hi masiku hinkwawo ya hina.

¹⁵U hi tsakisa ku ringana masiku lawa u hi xaniseke ha wona, Ni malembe lawa hi voneke khombo ha wona.

¹⁶Ntirho wa wena a wu vonakarise ka malandza ya wena, Ni ku kwetsima ka wena eka vana va vona!

¹⁷Tintswalo ta Yehovha, Xikwembu xa hina, a ti ve ka hina! Hi tiyisele ntirho wa mavoko ya hina, Ina, tiyisa ntirho wa mavoko ya hina!