Read Xitsonga Psalms 94 Bible Online

Psalms 94 - Xitsonga bible

Psalms 94

¹Oho Yehovha, Xikwembu xa ku rihisela! Xikwembu xa ku rihisela, tivonakarise!

²Pfuka Muavanyisi wa misava! U nyika vatikukumuxi hakelo ya vona!

³Oho Yehovha, lavo homboloka, va ta fika kwihi, Lavo biha va ta tsaka ku yisa kwihi?

⁴Va vulavula hi ku tikukumuxa; Hinkwavo lava dyohaka va tidzunisa.

⁵Oho Yehovha! Va kandziyela tiko ra wena; Va xanisa ndzhaka ya wena;

⁶Va dlaya nsati wa noni ni n'eni, Va lovisa swisiwana.

⁷Va ku: “Yehovha a nga swi voni, Xikwembu xa Yakobo a xi swi endli mhaka!”

⁸Tivoneleni n'wina vavanuna va mitlunya! Na n'wina swihunguki, mi ta tlhariha rini?

⁹La nga mirisa ndleve, a nga ka a nga twi xana? La nga vumba tihlo, a nga ka a nga voni xana?

¹⁰La layaka matiko, a nga ka a nga tshinyi xana? Kasi hi yena la dyondzisaka vanhu vutlhari.

¹¹Yehovha u tiva miehleketo ya vanhu leswaku i swahava.

¹²Ku katekile munhu loyi u n'wi layaka, Yehovha! Loyi u n'wi dyondzisaka hi nawu wa wena.

¹³U ta n'wi rhulisa loko masiku ya khombo ma humelela, Ku kondza rindzi ri celeriwa lowo biha.

¹⁴Hikuva Yehovha a nga ka a nga cukumeti tiko ra yena, A nga tshiki ndzhaka ya yena.

¹⁵Hikuva ku avanyisa ku ta tlhelela eku lulameni, Kutani hinkwavo va timbilu to lulama va ta ku khensa.

¹⁶I mani la nga ta ndzi lwela eka lavo biha? Ni ku ndzi pfuna emahlweni ka vadyohi?

¹⁷Loko ngi Yehovha a nga ndzi pfunanga, Moya wa mina ingi wu yile exivandleni xa ku miyela.

¹⁸Kakuloko ndzi ku: “Nenge wa mina wu rhetemuka!” Vunene bya wena, Yehovha, byi ndzi seketela.

¹⁹Mbilu ya mina loko yi tele mivilelo, Ku chavelela ka wena ku tsakisa moya wa mina.

²⁰Xana u nga va ni ku hlangana ni xiluvelo xa vahomboloki, Vona lava sorisaka nawu xana?

²¹Va rhambanela moya wa lowo lulama, Va avanyisa ngati ya la nga riki na nandzu.

²²Kambe Yehovha i khokholo ra mina. Xikwembu xa mina i ribye ra xichavelo xa mina.

²³U ta vuyisela ka vona ku homboloka ka vona, U ta va herisa hi vudyohi bya vona; Ina, Yehovha, Xikwembu xa hina u ta va herisa.