Read Xitsonga Psalms 96 Bible Online

Psalms 96 - Xitsonga bible

Psalms 96

¹Yimbelelani Yehovha risimu lerintshwa! Yimbelelani Yehovha, n'wina hinkwenu, vaaki va misava!

²Yimbelelani Yehovha, mi dzunisa vito ra yena, Vulani siku rin'wana ni rin'wana ku hlayiseka ka yena!

³Mi twarisa ku kwetsima ka yena exikarhi ka matiko, Ni mahlori ya yena exikarhi ka matiko hinkwawo!

⁴Hikuva Yehovha hi lonkulu, wa dzuneka ngopfu, Wa chavisa ku tlurisa swikwembu hinkwaswo;

⁵Hikuva swikwembu hinkwaswo i swifaniso ntsena, Kasi Yehovha u endlile matilo.

⁶Ku kwetsima ni ku twala swi le mahlweni ka yena, Matimba ni vuhosi swi le ndlwini ya yena.

⁷N'wina, tinxaka ta matiko, nyikani ka Yehovha, Nyikani ka Yehovha ku kwetsima ni matimba!

⁸Nyikani ka Yehovha ku kwetsima loku fanelaka vito ra yena, Tisani magandzelo, mi nghena erikupakupeni ra yena,

⁹Khinsamelani Yehovha hi swilombiso leswi hlawuriweke, Mi rhurhumela emahlweni ka yena n'wina hinkwenu vaaki va misava.

¹⁰Vulani xikarhi ka matiko, mi ku: “Yehovha wa fuma. Na yona misava yi tiyile, a yi tsekatseki; Yehovha u ta avanyisa matiko hi ku lulama.”

¹¹A ku tsake matilo, misava a yi tsake na yona. Lwandle a ri bobome, ni hinkwaswo leswi nga ka rona,

¹²Mitsunga a yi huwelele hi ku tsaka ni hinkwaswo leswi nga ka yona; Mirhi hinkwayo ya swihlahla a yi bongose hi ku tsaka,

¹³Emahlweni ka Yehovha! Hikuva wa ta, Wa ta ku avanyisa misava; U ta avanyisa misava hi ku lulama, Ni matiko hi vunene bya yena.