Read Xitsonga Psalms 99 Bible Online

Psalms 99 - Xitsonga bible

Psalms 99

¹Yehovha wa fuma, matiko ma rhurhumela; U tshamile exikarhi ka tikerubu; misava ya tsekatseka.

²Yehovha u lonkulu eSiyoni, U tlakukile ehenhla ka matiko hinkwawo.

³A va dzunise vito ra wena lerikulu leri chavisaka, Hikuva ri hlawulekile!

⁴A va dzunise matimba ya Hosi leyi rhandzaka ku lulama! Hi wena la tiyisaka ku lulama, La humeseleke Yakobo ku avanyisa ni ku lulama.

⁵Dzunisani Yehovha, Xikwembu xa hina, Mi khinsama emahlweni ka vunavelo bya milenge ya yena, Hikuva u hlawulekile!

⁶Muxe na Aroni exikarhi ka vaprista va yena; Na Samiele, un'wana wa lava khongelaka vito ra yena, Va khongele Yehovha, kutani a va yingisa.

⁷A vulavula na vona epapeni; Va hlayisa ku lerisa ka yena, Ni milawu leyi a nga va nyika yona.

⁸Oho Yehovha, Xikwembu xa hina u va yingisile, U vile eka vona Xikwembu lexi va rivalelaka, Kambe u rihisile ku dyoha ka vona.

⁹Dzunisani Yehovha, Xikwembu xa hina, Mi n'wi khinsamela entshaveni leyo kwetsima ya yena; Hikuva u hlawulekile, Yehovha, Xikwembu xa hina!