Read Xitsonga Proverbs 11 Bible Online

Proverbs 11 - Xitsonga bible

Proverbs 11

¹Xikalo xa vunwa xi vengiwa hi Yehovha, Kambe mpimo lowo lulama wa n'wi tsakisa.

²Loko ku humelela ku tikukumuxa, hilaha tingana ti humaka kona, Kambe vutlhari byi le ka lava titsongahataka.

³Vunene bya lava lulameke bya va fambisa, Kambe ku homboloka ka timbabva ka ti lovisa.

⁴Rifuwo a ri pfuni nchumu esikwini ra vukari, Kambe ku lulama ku lwela munhu eku feni.

⁵Ku lulama ka loyi a lulameke ku ta n'wi khulelela ndlela, Kasi lowo biha u ta wisiwa hi ku biha ka yena.

⁶Ku lulama ka vanhu lavanene ku ta va ponisa, Kambe ku homboloka ka timbabva ku ta ti phasa.

⁷Siku lowo biha a faka, ku tshemba ka yena ka lova, Ni ku langutela ka la nga lulamangiki ka hela.

⁸Lowo lulama u lweriwa emakhombyeni, Lowo biha u nghena kona ematshan'weni ya yena.

⁹Musandzi u dlaya varikwavo hi nomu wa yena, Kambe lavo lulama va hlayisiwa hi ku tiva.

¹⁰Lavo lulama, loko va tsakile, muti wa yimbelela, Kambe siku ku lovaka lavo biha, i huwa ya ku tsaka.

¹¹Mikateko ya lavo lulama yi akisa muti, Kambe wu hangalasiwa hi milomu ya lavo hiha.

¹²La sandzaka warikwavo a nga na ku anakanya, Kambe la nga ni ku twisisa wa miyela.

¹³La xuxaka hi mahlevo u boxa makungu; Kambe lowa mbilu yo tshembeka u hlayisa timhaka.

¹⁴Tiko ri wisiwa hi ku pfumala switsundzuxo, Ku hlayiseka ku kona loko vatsundzuxi va tele.

¹⁵La tinghenisaka emilandzwini ya van'wana u ta gamagameka, Kambe la vengaka ku tiboha hi ku khomana hi voko u le ku rhuleni.

¹⁶Nsati lonene u tikumela xichavo, Kambe lava nga ni matimba va kuma rifuwo.

¹⁷Munhu wa tintswalo u endlela moya wa yena vunene, Kambe lowa lunya u tionha miri wa yena.

¹⁸Lowo biha, u tirha mitirho leyi kanganyisaka, Kambe la byalaka ku lulama u ni hakelo leyi tiyeke.

¹⁹Ku lulama ka xiviri ku yisa evutomini, Loko a ri loyi a landzelaka swo biha u tsutsumela eku feni.

²⁰Va timbilu leto homboloka i manyala eka Yehovha; Kambe lava fambaka hi ku lulama, u tsakisiwa hi vona.

²¹Kunene lowo biha a nga ka a nga tshikiwi ku biwa; Kambe ndyangu wa munhu wo lulama wu ta lamuleriwa.

²²Wansati wa xiyimo xo saseka la pfumalaka miehleketo, I sindza ra nsuku enhompfini ya nguluve.

²³Ku navela ka lavo lulama i swinene ntsena; Ku tshemba ka lavo biha i ku kariha.

²⁴Un'wana wa hanana, kasi wa engeteriwa; Un'wana wa tsonana, kambe u hundzuka xisiwana.

²⁵La hananaka u ta nona, La cheletaka u ta cheletiwa na yena.

²⁶Loyi a alaka ni mavele ya yena u ta rhuketeriwa hi vanhu, Kambe la pfumelaka ku xavisa wona mikateko yi ta va enhlokweni ya yena.

²⁷La phikelelaka vunene u ta kuma tintswalo, Kambe la lavaka swo biha u ta khomiwa ha swona.

²⁸La tshembaka rifuwo ra yena u ta wa, Kambe lavo lulama va ta kula kukotisa matluka ya mirhi.

²⁹La pfilunganyaka yindlu ya yena, ndzhaka ya yena yi ta va mheho ntsena, Xihunguki xi ta va nandza wa munhu wa mbilu yo tlhariha.

³⁰Mihandzu ya munhu wo lulama i murhi wa vutomi; La tlhariheke u tikumela timbilu ta vanhu.

³¹Hambi a va la lulameke, wa hakeriwa laha emisaveni, Swi to yini eka lowo biha ni mudyohi!