Read Xitsonga Proverbs 12 Bible Online

Proverbs 12 - Xitsonga bible

Proverbs 12

¹La rhandzaka ku layiwa u rhandza vutivi, Kambe la vengaka ku tshinyiwa i xihunguki.

²Munhu wa vunene u ta kuma tintswalo eka Yehovha, Kambe lowa makungu layo biha u ta avanyisiwa.

³Munhu a nga ka a nga tiyisiwi hi leswo biha; Loko ri ri rimitsu ra lavo lulama, ri nga ka ri nga tsekatsekisiwi.

⁴Wansati lonene i harhi ya vubombi eka nuna wa yena, Kambe la khomisaka tingana u kotisa ku bola emarhambyini ya yena.

⁵Meehleketo ya lavo lulama yi sasekile, Kambe makungu ya lavo biha hi lama kanganyisaka.

⁶Marito ya lavo biha i marindzi ya ku halata ngati, Loko yi ri milomu ya lava lulameke ya va kutsula.

⁷Lavo biha va wisiwa, va lova; Kambe yindlu ya lavo lulama yi sala yi yimile.

⁸Munhu u ta dzunisiwa hi ku ringanisa vutlhari bya yena, Kambe mbilu ya lowo homboloka yi ta monyiwa.

⁹La monyiwaka a ri ni nandza un'we, U tlula kule la tidzunisaka a nga ri na swakudya.

¹⁰Munhu wo lulama u tsetselela vutomi bya xifuwo xa yena, Kambe ku tsetselela ka lavo biha ka vavisa.

¹¹La tirimelaka nsimu u ta xurha swakudya; Loko a ri loyi a tinyiketaka mafenya, u pfumala vutlhari.

¹²Lowo biha u navela leswi phangiweke hi lavo biha, Kambe rimitsu ra lava lulameke ri veka mihandzu.

¹³Lowo biha u phasiwa hi nandzu wa nomu wa yena, Kambe lowo lulama u ta huma ekhombyeni.

¹⁴Hi ta nomu wa yena, munhu u ta xurha vunene, Leswi mavoko ya munhu ma swi tirhaka swi ta tlheriseriwa eka yena.

¹⁵Ndlela ya xihunguki yi lulamile emahlweni ya xona, Kambe la amukelaka ku layiwa u tlharihile.

¹⁶Xihunguki xi humesa vukari bya xona, Kambe lowo tlhariha u fihla ku dyoha ka la n'wi dyoheleke.

¹⁷La vurisaka u humesa swo lulama, Kambe mbhoni ya vunwa yi vulavula swa ku kanganyisa.

¹⁸La vulaka swahava wa tlhava kukota tlhari; Kambe nomu wa lowo tlhariha wa hanyisa.

¹⁹Nomu lowu vulaka ntiyiso, wu tiya makumu, Kambe ririmi ra vunwa i ra nkarhinyana ntsena.

²⁰Lava kanelaka swo biha, lunya ri le timbilwini ta vona, Kambe lava kanelaka swo rhula va tsaka.

²¹La lulameke a nga teli hi khombo; Kambe lavo biha va talela hi nhlomulo.

²²Milomu ya mavunwa i manyala eka Yehovha, Kambe lava endlaka swinene va n'wi tsakisa.

²³Muxiyaxiyi u fihla vutivi, Kambe mbilu ya xihunguki yi dzunisa vuhunguki bya yona.

²⁴Voko ra munhu la tirhaka ri ta fuma, Kambe voko ra lolo ri ta tirhela van'wana.

²⁵Ku kanakana, loko ku ri embilwini ya munhu, ka n'wi tova, Kambe rito lerinene ra n'wi tsakisa.

²⁶La lulameke u fambisa mianakanyo ya nakulobye, Kambe ndlela ya lavo biha ya va lovisa.

²⁷Lolo a ri oxi xiharhi xa rona, Kambe ngingi i rifuwo ra munhu leri tiyeke.

²⁸Vutomi byi kona, endleleni ya ku lulama, Emitileni ya kona a ku na ku fa.