Read Xitsonga Proverbs 14 Bible Online

Proverbs 14 - Xitsonga bible

Proverbs 14

¹Wansati la tlhariheke u aka yindlu ya yena, Kambe wa mihoni wa yi hahlula hi mavoko ya yena.

²La fambaka hi ku lulama u chava Yehovha, Kambe la homboloxaka tindlela ta yena wa n'wi tsan'wa.

³Enon'wini wa xihunguki ku ni nkhavi wa ku ba ku tikukumuxa ka xona, Kambe milomu ya lavo tlhariha ya va hlayisa.

⁴Laha tihomu ku nga hava, na rona tshanga ri omile, Kambe matimba ya tihavi ma engetela rifuwo.

⁵Mbhoni yo tshembeka a yi vulavuri vunwa, Kambe mbhoni yo hemba yi vula mavunwa ntsena.

⁶Musandzi u lava vutlhari, kambe a nga byi kumi, Kasi mano ma kumeka hi ku olova hi lava nga ni ku twisisa.

⁷Hambana ni xihunguki, Hikuva a ku na vutivi emilon'wini ya xona.

⁸Vutlhari bya la tlhariheke, i ku twisisa ndlela ya yena, Kambe vuhunguki bya xihunguki ku xisa ntsena.

⁹Swihunguki swi sandza milandzu, Kambe eka lavo lulama ku tsakisa ku kona.

¹⁰Mbilu yi titivela ku vava ka yona, Ni ku tsakisisa ka yona ku nga ka ku nga kumiwi hi un'wana.

¹¹Yindlu ya lavo biha yi ta handziwa, Kambe xitsongana xa lavo lulama xi ta tiya.

¹²Ndlela yi kona leyi vonekaka eka munhu ingi yi lulamile, Kasi makumu ya yona ma yisa eku feni.

¹³Munhu a nga hleka a ri karhi a vaviseka embilwini, Kasi makumu ya ku tsaka i tingana.

¹⁴Wa mbilu leyi tidyelelaka u ta phiriwa hi mikhuva ya yena, Kambe la lulameke u ta xurha hi leswi nga embilwini ya yena.

¹⁵Murivali u pfumelela marito hinkwawo, Kambe la nga ni ku anakanya u xiya laha a kandziyaka kona.

¹⁶La tlhariheke u ni xichavo, kutani u papalata swo biha, Kambe xihunguki xi honisa ntsena, xi titshemba.

¹⁷Munhu la angwetlaka ku kariha u endla swo hunguka, Wa timhaka ta lunya wa vengiwa.

¹⁸Ndzhaka ya varivali i ku rivala, Kambe va ku anakanya va tirhwexa harhi ya vutivi.

¹⁹Lavo biha va korhamela emahlweni ka lavanene, Ni va mona etinyangweni ta lavo lulama.

²⁰Xisiwana xi vengiwa ni hi la vandzamaneke na xona, Kambe vanakulobye va mufuwi va tele.

²¹La sandzaka warikwavo wa dyoha, Kambe ku katekile munhu la nga ni vunene eka xisiwana.

²²Lava kanelaka swo biha a va lahleki xana? Kambe leswinene ni ntiyiso i swa lava kanelaka vunene.

²³Ntirho wun'wana ni wun'wana wu ni hakelo, Kambe ku vulavula ka milomu ku helela endlaleni.

²⁴Rifuwo ra lavo tlhariha i harhi ya vuhosi ya vona, Loko byi ri vuhunguki bya xihunguki i vuhunguki ntsena.

²⁵Mbhoni leyinene yi lamulela mimoya ya vanhu, Loko yi ri leya vunwa yi phyaphyarha mavunwa ntsena.

²⁶Exichabyeni xa Yehovha ku ni ku tshemba ka xiviri, Kutani eka vana va yena i xichavelo.

²⁷Ku chava Yehovha i xihlovo xa vutomi Ku tingawurisa vanhu emakheleni ya rifu.

²⁸Ku twala ka hosi i ku tala ka vanhu, Kambe ku pfumaleka ka vanhu i ku onhaka ka n'wana wa hosi.

²⁹La hlwelaka ku kariha u ni ku anakanya lokukulu, Kambe wa mbilu ya tihanyi, u tshovela vuhunguki.

³⁰Ku tsaka ka miri i mbilu leyo basa, Kambe mona i ku bola ka marhambu.

³¹La xanisaka xisiwana u sandza muendli wa xona, Kambe la nga ni vunene eka xisiwana, wa n'wi dzunisa.

³²Mudyohi u wisiwa hi ku dyoha ka yena, Kambe la lulameka u ni ku tshemba ni le ku feni ka yena.

³³Vutlhari byi akile embilwini ya munhu wa ku anakanya, Kambe miehleketo ya swihunguki ya tiviwa.

³⁴Ku lulama ku kurisa tiko, Kambe ku homboloka i xisandzu xa matiko.

³⁵Nandza wo tlhariha u dzuneka eka hosi, Kambe yi venga loyi a khomisaka tingana.