Read Xitsonga Proverbs 16 Bible Online

Proverbs 16 - Xitsonga bible

Proverbs 16

¹Makungu ya mbilu i ya munhu; Loko ku ri ku hlamula ka ririmi ku huma eka Yehovha.

²Mikhuva hinkwayo ya munhu yi lulamile emahlweni ka yena, Kambe Yehovha u pima mimoya.

³Nyiketa Yehovha timhaka ta wena hinkwato, Kutani makungu ya wena ma ta tiya.

⁴Yehovha u lerisile swilo hinkwaswo emakungwini ya yena, Na yena lowo biha, u endleriwe siku ra khombo.

⁵Munhu un'wana ni un'wana la tikurisaka hi mbilu, i manyala eka Yehovha; Kunene u ta biwa, a nga ka a nga poni.

⁶Ku dyoha ku funengetiwa hi tintswalo ni ntiyiso, Hi ku chava Yehovha, vanhu va fularhela swo biha.

⁷Yehovha loko a tsakisiwa hi ku famba ka munhu, U twananisa na yena hambi va ri valala va yena.

⁸Rifuwo leri tsanana leri nga ni ku lulama, Ri tlula ku bindzula ka xuma xo tala lexo homboloka.

⁹Mbilu ya munhu yi tikanelela ndlela; Kambe i Yehovha la lulamisaka mikondzo ya yena.

¹⁰Ku bvumbha ku le milon'wini ya hosi; Nomu wa yona a wu hoxi eku avanyiseni ka timhaka.

¹¹Mpimo ni xikalo lexo lulama i swa Yehovha, Hinkwawo maribye ya ku pima lama nga enkwameni, i ntirho wa yena.

¹²I manyala eka tihosi ku endla leswi nga lulamangiki, Hikuva xitshamo xa vuhosi xi tiyisiwa hi ku lulama.

¹³Hosi yi tsakisiwa hi milomu leyinene, Yi rhandza lava vulavulaka leswo lulama.

¹⁴Ku hlundzuka ka hosi ku kota ntsumi ya rifu, Kambe munhu wa vutlhari u ta yi rheleta mbilu.

¹⁵Eku vonakaleni ka mombo wa hosi ku ni vutomi, Rirhandzu ra yena i papa leri nisaka mpfula ya le ndzhaku.

¹⁶Ku fuwa vutlhari, ku tlula nsuku, Ni ku fuwa ku twisisa ku tlula silivhere.

¹⁷Gondzo ra lavo lulama, i ku fularhela swo biha, La hlayisaka moya wa yena u xiya mafambele ya yena.

¹⁸Ku tikurisa ku rhangela ku lova, Ku tidzunisa ku rhangela ku wa.

¹⁹Ku tsongahatiwa ni lavatsongo, Ku tlula ku avelana xuma ni lava tikurisaka.

²⁰La anakanyaka etimhakeni u ta vona vunene, Ni loyi a tshembaka Yehovha u katekile.

²¹Wa mbilu yo tlhariha u vuriwa la twisisaka, Nomu wa yena wa nandziha, wu tatisa ku tiva.

²²Ku twisisa i xihlovo xa vutomi eka lava ku fuweke, Kambe swihunguki swi layiwa hi vuphukuphuku.

²³Mbilu ya la tlhariheke yi tlharihisa nomu wa yena, U tiyisa tidyondzo hi ku vulavula ka yena.

²⁴Marito yo saseka i xihlenga xa vulombe, Ma tsakisa moya, ma hanyisa marhambu.

²⁵Ndlela yi kona leyi vonekaka eka munhu ingi yi lulamile, Kasi makumu ya yona, ma yisa eku feni.

²⁶La tirhaka hi mavoko wa titirhela, Hikuva u susumetiwa hi ku dya.

²⁷Munhu wa lunya u cela khele ra khombo, Kutani nomu wa yena wu ni langavi ro hisa.

²⁸Munhu wa lunya u byala timholovo, Muhlevi u hambanyisa vanakulobye.

²⁹Munhu wa nsele u boha loyi a fambaka na yena, A n'wi kokela endleleni leyo biha.

³⁰La tshunyetaka hi mahlo ku kanela swa lunya, Ni la putsamaka nomu, va endlile leswo biha.

³¹Misisi ya timpfu i harhi ya xichavo, Yi kumeka endleleni ya ku lulama.

³²La hlwelaka ku kariha u tlula nhenha, Ni la hlulaka mbilu ya yena u tlula la tekaka miti.

³³Va hoxa vuhlolotwana engubyeni, Kambe lexi vuriwaka hi byona xi huma eka Yehovha.