Read Xitsonga Proverbs 17 Bible Online

Proverbs 17 - Xitsonga bible

Proverbs 17

¹Swikoko ntsena, laha ku nga ni ku rhula, Swi tlula hi ku nandziha yindlu leyi teleke hi tinyama, laha timholovo ti nga kona.

²Nandza wa vutlhari u ta fuma n'wana la khomisaka tingana, U ta dya ndzhaka ni vana va hosi ya yena.

³Xirhengele i xa ntsopfu ni swa nsuku, Kambe la ringetaka timbilu, i Yehovha.

⁴La endlaka swo biha u yingisela milomu yo biha, Ni muhembi u yingisela ririmi ro hleva.

⁵La hlekaka xisiwana u sola la n'wi vumbeke, Ni la tsakelaka makhombo ya van'wana a nga ka a nga poni eku biweni.

⁶Vatukulu i xidlodlo xa lava dyuhaleke, Ku twala ka vana ku huma eka vatata wa vona.

⁷Marito yo saseka ya ku tikurisa a ma lulameli xihunguki, Ngopfu marito ya vunwa ma tshuna nkulukumba.

⁸Tinyiko i ribye ra risima eka loyi a ti nyikaka. Hinkwako laha a nghenaka kona wa dzuneka.

⁹La nga fihla milandzu u lava rirhandzu; La yi pfuxaka u nghenisa ku hambana exikarhi ka lava rhandzanaka.

¹⁰Munhu wa ku anakanya u twa ku tshinyiwa Ku tlula xihunguki loko xi biwa ka dzana.

¹¹Munhu wa lunya u ni ximonyo, Kambe u ta rhumeriwa ntsumi ya tihanyi.

¹²Ku hlangana ni bere leyi tekeriweke vana va yona, Ku tlula ku hlangana ni xihunguki eku hlanyeni ka xona.

¹³Ku biha ku nga ka ku nga suki endlwini ya munhu La tlheriselaka swo saseka hi ku biha.

¹⁴Ku sungula ku hambana, i ku boxa ka ndhambi; Hikwalaho, loko mholovo yi nga si sungula, suka.

¹⁵La yimelelaka la nga ni nandzu, ni la kanetaka la nga riki na nandzu, Ha vambirhi i manyala eka Yehovha.

¹⁶Mali yi pfuna yini evokweni ra xihunguki-ke? Xana i ku xava vutlhari-ke? Kambe xi pfumala mbilu.

¹⁷Munghana wa munhu wa n'wi rhandza hi masiku; I makwavo emakhombyeni.

¹⁸La nga riki na ku anakanya, hi la khomanaka ni un'wana hi mavoko, A tiboha hi nandzu wa warikwavo.

¹⁹La rhandzaka timholovo u rhandza xidyoho, La kurisaka nyangwa ya yena u lava ku lova.

²⁰Wa mbilu yo soholoka a nga ka a nga kumi ku kateka, Ni wa ririmi ro soholoka u ta wela eku biheni.

²¹La velekaka xihunguki u ta fuwa tingana, Ni tata wa singe a nga ka a nga tsaki.

²²Mbilu leyi tsakeke i murhi lowu tiyisaka, Kasi moya lowu dyaka mbitsi wu omisa marhambu.

²³Lowo biha u amukela nyiko leyi fihliweke etingubyini Ku voyamisa tindlela to lulama.

²⁴Wa ku anakanya u langutisisa vutlhari emahlweni ka yena, Kambe mahlo ya xihunguki ma rhalarhala emakumu ya misava.

²⁵Xihunguki xa n'wana u khomisa tata wa yena tingana, U dyisa mbitsi la n'wi velekeke.

²⁶Ku rihisa munhu la pfumalaka nandzu a swi saseki, Hambi ku ri ku ba lavakulu hikwalaho ka ku lulama ka vona.

²⁷La tikhomaka emaritweni u tiva ku tlhariha, La tisivaka nomu u ni ku twisisa.

²⁸Swi tsandza ni rihuhu loko ri miyela, ri nga vuriwa la tlhariheke, Ni la putsamaka nomu i munhu wa ku anakanya.