Read Xitsonga Proverbs 2 Bible Online

Proverbs 2 - Xitsonga bible

Proverbs 2

¹N'wananga loko u amukela marito ya mina, U va u tihlayisela milawu ya mina,

²Loko u rhiya ndleve ya wena ku yingisa vutlhari, U nyiketa mbilu ya wena eku yingiseni;

³Ndzi ri, loko u rilela vutivi, Loko u huwelela ku twisisa,

⁴Loko u swi lava kukotisa mali, U hakuta kukotisa xuma lexi fihliweke,

⁵Hilaha u nga ta twisisa ku chava ka Yehovha, U ta kuma ku tiva ka Xikwembu.

⁶Hikuva Yehovha hi yena la nyikaka vutlhari; Ku tiva ni ku twisisa swi huma enon'wini wa yena.

⁷U hlayisela lavo lulama ku kateka, A va xitlhangu eka lava fambaka eku lulameni.

⁸U tiyisa mitila ya lava fambaka hi mfanelo, U hlayisa ndlela ya lava n'wi rhandzaka.

⁹Hi kona u nga ta tiva ku lulama ni mfanelo. Ni ku saseka, ni mikhuva hinkwayo ya leswinene.

¹⁰Loko vutlhari byi ta nghena embilwini ya wena, Ku tiva ku ta tsakisa moya wa wena;

¹¹Ku anakanya ku ta ku langutela, Ku twisisa ku ta ku hlayisa,

¹²Ku ku tshunxa endleleni leyo biha, Ni ku ku hambuxa eka lava vulavulaka swo homboloka,

¹³Eka lava fularhelaka ndlela yo lulama, Lava fambaka hi tindlela ta munyama,

¹⁴Lava tsakelaka ku kanganyisa, Va tsakela mikhuva yo biha,

¹⁵Valavo tindlela ta vona ti hambukeke, Ni mafambele ya vona ma hombolokeke;

¹⁶Ku ku namurhuta eka wansati wa un'wana, Eka wansati wa dlakuta la kanganyisaka hi ku vulavula ka yena,

¹⁷La fularheleke nakulobye wa vuntshwa bya yena, A rivala ntwanano wa Xikwembu xa yena.

¹⁸Kunene yindlu ya yena yi voyamele rifu, Tindlela ta yena ti yisa eka lava feke;

¹⁹Eka lava yaka eka yena, a ku na un'we la nga vuya, A khoma ndlela ya vutomi.

²⁰Hikwalaho, famba hi mitila ya lavanene, U tiyisela endleleni ya lavo lulama.

²¹Hikuva lava lulameke va ta aka emisaveni, Lavo tenga va ta siyiwa kona;

²²Kambe lavo biha va ta susiwa la emisaveni, Ni timbabva ti ta tsuvuriwa eka yona.