Read Xitsonga Proverbs 21 Bible Online

Proverbs 21 - Xitsonga bible

Proverbs 21

¹Mbilu ya hosi i xinambyana xa mati evokweni ra Yehovha, U yi fambisa hinkwako laha a rhandzaka kona.

²Tindlela hinkwato ta munhu ti lulamile emahlweni ya yena, Kambe Yehovha hi yena la pimaka timbilu.

³Ku endla leswinene ni leswo lulama, Swi tsakisa Yehovha ku tlula magandzelo.

⁴Mahlo lama tlakukeke, ni mbilu yo tikurisa, I rivoningo ra lavo biha, kambe swi bihile.

⁵Makungu ya la gingiritekaka ma yisa endzalweni, Kambe xihatli xi ta wela endlaleni.

⁶Ku tihlengeletela rifuwo hi ririmi ro hemba, I hunguva leyi hangalakaka ya vanhu lava tsutsumaka eku feni.

⁷Ku onha ka vadyohi ku ta va phatlula, Hikuva va ala ku endla leswo lulama.

⁸Munhu wa ndlela ya ku homboloka u fularhela ku lulama, Kambe mitirho ya munhu wa ku lulama yi sasekile.

⁹Ku tiakela emafulelweni ya yindlu, Swi tlula ku tshama endlwini leyikulu ni nsati wa ku leva.

¹⁰Moya wa lowo biha wu navela swo biha, Swi tsandza ni warikwavo, a nga kumi tintswalo eka yena.

¹¹Loko ku rihisiwa musandzi, varivali va tlhariha, Loko ku dyondzisiwa la tlhariheke u amukela vutivi.

¹²La lulameke u tsundzuka yindlu ya lowo biha; Yehovha u wisela lavo biha ekhombyeni.

¹³La tisivaka tindleve leswaku a nga twi mikosi ya swisiwana, U ta rila na yena, kambe a nga ka a nga tsundzukiwi hi munhu.

¹⁴Ku nyika ka le xihundleni ku rheleta vukari, Ni nyiko leyi nghenisiweke exifuveni yi rheleta ku hlunama lokukulu.

¹⁵Swi tsakisa la lulameke, ku endla ku lulama Kambe i ku dlawa ka lavo homboloka.

¹⁶Munhu la hambukaka ndlela ya ku anakanya U ta ya tshama enhlengeletanweni ya vafi.

¹⁷La huhelaka ku tsaka u ta va la pfumalaka, La tinyiketaka vhinyo ni mafurha a nga ka a nga fuwi.

¹⁸Lowo biha i nkutsulo lowu humeseriwaka lonene Ni mbabva i nkutsulo wa lowo lulama.

¹⁹Ku tiakela emananga, Swi tlula ku tshama ni nsati wa timholovo ni wa ku kariha.

²⁰Vukosi byo naveta ni mafurha swi le ndlwini ya la tlhariheke, Kambe xihunguki xi swi mita ntsena.

²¹La tsutsumelaka ku lulama ni tintswalo, U ta kuma vutomi, ni ku lulama, ni ku twala.

²²La tlhariheke u khandziya emutini wa tinhenha, U wisa khokholo ra lava titshembaka.

²³La tihlayisaka nomu ni ririmi U chavisa moya wa yena mahlomulo.

²⁴Musandzi i vito ra munhu la tikukumuxaka ni wa manyunyu; U endla hinkwaswo hi ku kariha ni ku tikurisa.

²⁵Ku navela ka lolo ka ri dlaya, Hikuva mavoko ya rona ma ala ku tirha,

²⁶Masiku hinkwawo, timhaka ta rona i ku navela, Kambe la lulameke u hanana a nga kanakani.

²⁷Magandzelo ya lavo biha i manyala, Ngopfu loko va gandzela hi makungu layo biha.

²⁸Mbhoni ya mavunwa yi ta lova, Kambe munhu wo yingisela u ta vulavula hi masiku.

²⁹Munhu wo biha u onya mombo, a nga ri na tingana, Kambe lowo lulama u tiyisa ndlela ya yena.

³⁰A ku na vutlhari, a ku na ku anakanya, A ku na makungu emahlweni ka Yehovha.

³¹Hanci yi lunghiseriwa siku ra nyimpi, Kambe ku pona i ka Yehovha.