Read Xitsonga Proverbs 24 Bible Online

Proverbs 24 - Xitsonga bible

Proverbs 24

¹U nga naveli vanhu va nsele, U nga naveli ku tshama na vona;

²Hikuva timbilu ta vona ti kanela ku onhaka, Ni milomu ya vona yi vulavula swo homboloka.

³Yindlu yi akiwa hi vutlhari, Yi tiyisiwa hi ku twisisa;

⁴Hi ku tiva, makamara ya yona ma tala Hi rifuwo ra risima leri tsakisaka.

⁵La tlhariheke u ni matimba, Ni munhu wo dyondzeka u tiyisa matimba ya yena;

⁶Hikuva u ta huma nyimpi hi ku twisisa, Kutani ku hlayiseka ku le vunyingini bya vatsundzuxi.

⁷Vutlhari byi tlakukile, byi tlula xihunguki; Ehubyeni a xi na nomu.

⁸La kanelaka leswo biha U vuriwa n'wansele.

⁹Makungu ya vuhunguki i xidyoho ntsena, Ni musori i manyala eka vanhu.

¹⁰Loko u tsana esikwini ra khombo, Matimba ya wena matsanana.

¹¹Kutsula lava yisiwaka eku feni, U ponisa lava yaka eku dlayiweni va karhi va dedeleka.

¹²Loko u ku: “A ndzi va tivanga!” La pimaka timbilu a nga swi voni xana? Loyi a xiyaka moya wa wena a nga swi tivi xana? A nga ka a nga hakeli munhu ha un'we hi ku ringanisa mitirho ya yena xana?

¹³N'wananga, dyana vulombe, hikuva bya nandziha, Ni xihlenga xa byona, xi ta nandziha emalakeni ya wena.

¹⁴Ku tiva vutlhari ku ta va tano emoyeni wa wena; Loko u byi kuma byi ta va kona hi masiku, Ni ntshembo ya wena yi nga ka yi nga lahleki.

¹⁵U nga celeri yindlu ya lowo lulama makhele, U nga onhi laha a wisaka kona;

¹⁶Hikuva la lulameke, hambi a nga wa kantlhanu na kambirhi, u ta pfuka, Kambe vadyohi loko va khunguvanyekile va wela eku biheni.

¹⁷U nga tsakeli ku wa ka nala wa wena loko a khunguvanyekile, U nga khindlimuki embilwini ya wena;

¹⁸Kumbe xana loko Yehovha a vona sweswo, swi ta biha emahlweni ya yena, A tingisa vukari bya yena byi n'wi sukela.

¹⁹U nga vileri hikwalaho ka lava dyohaka, U nga vondzoki vadyohi;

²⁰Hikuva lavo biha a va na ku tshemba eka leswi nga ta ta, Rivoni ra lavo biha ri ta timeka.

²¹N'wananga, chava Yehovha ni hosi, U nga toloveli va timholovo;

²²Hikuva khombo ra vona ri ta fika kan'wekan'we, I mani la tivaka ku onhaka ka un'wana ni un'wana wa vona?

²³Lawa, ma ha ri marito ya lavo tlhariha. Ku languta vanhu hi nghohe eku avanyiseni, a swi saseki.

²⁴La nge eka mudyohi: “U lulamile!” Vanhu va ta n'wi rhuketela, matiko ma ta n'wi nyenya.

²⁵Kambe lava n'wi holovelaka va ta tsaka, Va ta humelela hi ku kateka lokunene.

²⁶La hlamulaka hi marito manene, U ntswontswa munhu enon'wini.

²⁷Sasa mitirho ya wena ehandle, U lunghisa ni nsimu ya wena, U ta tiva ni ku aka yindlu ya wena.

²⁸U nga vi mbhoni ku lwa ni warikwenu ku nga ri na mhaka; U nga dyelerisa ku yini hi milomu ya wena?

²⁹U nga tshuki u ku: “Leswi a ndzi endleleke swona ndzi ta n'wi endla, Ndzi ta tlherisela eka un'wana ni un'wana hi mitirho ya yena.”

³⁰Ndzi tshama ndzi hundza ensin'wini ya lolo, Ni le vhinyeni ya loyi a hungukeke.

³¹Ndzi vona ku mirile madinda, Ni rikumbakumba ri funengetile hinkwako, Kutani rirhangu ra maribye ri mbundzumukile.

³²Loko ndzi ri mina, ndzi langutisisa, Ndzi anakanya, ndzi kuma dyondzo kona;

³³Vurhongwanyana, ni ku khudzehelanyana, Ni ku khondla mavoko ku tilata,

³⁴Vusiwana byi ta ta byi ku tshukisa kukota muendzi, Ni ndlala kukota munhu la hlomeke.