Read Xitsonga Proverbs 25 Bible Online

Proverbs 25 - Xitsonga bible

Proverbs 25

¹Swa ha ri swona swivuriso swa Solomoni leswi tsariweke hi vanhu va Hezekiya, hosi ya Yuda.

²Ku twala ka Xikwembu i ku fihla mhaka; kambe ku yi kambisisa i ku twala ka tihosi.

³Ku tlakuka ka matilo ehenhla ni ku enta ka misava, Ni timbilu ta tihosi a swi na ku kambiwa.

⁴Susa manyelo esilivhereni, Kutani xifuri xi ta endla mbita ha yona.

⁵Susa lowo biha emahlweni ka hosi, Xitshamo xa yona xi ta tiyisiwa hi ku lulama.

⁶U nga tikurisi emahlweni ka hosi, U nga tshami exitshan'weni xa lavakulu;

⁷Hikuva swi nga saseka loko va ku eka wena: “Tlhandlukela halenu,” Ku nga ri loko va ku tsongahata emahlweni ka hosi leyi u yi vonaka hi mahlo.

⁸U nga hatlisi ku ya eku tengeni, U nga ti tshuka u nga tivi lexi u nga ta hlamula xona makumu, Loko u kanetiwa hi warikwenu.

⁹Hambi u tenga ni warikwenu, U nga boxi makungu ya un'wana,

¹⁰A nga ti tshuka a swi twa, a ku sandza, A ku khomisa tingana leti ku namarhelaka.

¹¹Marito lama vulavuriweke hi nkarhi Ma kotisa malamula ya nsuku entewaneni wa silivhere.

¹²Eka tindleve ta munhu loyi a yingisaka, la layaka hi ku twisisa U kotisa senga ra nsuku ni harhi ya nsuku lowunene.

¹³Ntsumi leyi tshembekeke eka lava yi rhumeke Yi kotisa gamboko lero titimela enkarhini wa ku tshovela, Ri titimeta mbilu ya hosi yakwe.

¹⁴La tidzunisaka hi ku hanana ka mavunwa, U kotisa papa ni mheho leyi hungaka, mpfula ku ri hava.

¹⁵Hi ku lehisa mbilu, hosi ya fambisiwa, Ni ririmi ra ku olova ri tshova marhambu.

¹⁶Xana u kumile vulombe? U dya hi mpimo, Kumbe xana u nga kolwa u tlhela u hlanta.

¹⁷U nga toloveli ngopfu ndyangu wa warikwenu, A nga ti kolwa ha wena, a tlhela a ku venga.

¹⁸Munhu la hembaka vunwa ku onha warikwavo, I xigombo, ni fumu, ni nseve wo hlokohla.

¹⁹Xihunguki lexi u xi tshembeke hi siku ra khombo, I tino ro tshoveka ni nenge wo tsekatseka.

²⁰Ku funungula nguvu hi siku ra xirhami, Ni ku chela ntsuvi ehenhla ka nitra (murhi wa ku leva), I ku tlhavela mbilu ya nhlomulo tinsimu ta ku tsaka.

²¹Loko nala wa wena a ri ni ndlala, n'wi he swakudya a dya; Loko a ri ni torha, n'wi he mati a nwa;

²²Ma ta va makala yo hisa u n'wi hlengeletelaka enhlokweni, Kambe Yehovha u ta ku tlherisela.

²³Moya wa dzonga wu humesa mpfula, Ririmi leri tshivelaka exihundleni ri humesa mombo lowo kariha.

²⁴Ku tiakela emafulelweni ya yindlu, Swi tlula ku tshama endlwini leyikulu ni nsati wa ku leva.

²⁵Timhaka to nandziha leti humaka etikweni ra le kule, Ti kota mati ya ku tenga eka munhu la karheleke.

²⁶Xihlovo lexi pfindlusiweke ni lexi onhakeke, Xi fana ni munhu wo lulama la tsekatsekaka emahlweni ka mudyohi.

²⁷Ku xurha vulombe byo tala a hi swinene, Kutani ku tilavela ku twala a hi ku twala.

²⁸Munhu la hlulekaka ku fuma mbilu ya yena, I muti lowu ngheniweke hi valala, wu nga ri na rirhangu.