Read Xitsonga Proverbs 26 Bible Online

Proverbs 26 - Xitsonga bible

Proverbs 26

¹Kukotisa gamboko hi ximumu, ni mpfula enkarhini wa ku tshovela, Na xona xichavo a xi faneri xihunguki.

²Hilaha nyanyana yi hahelaka hala ni hala, na tona timbewulana ti wongawonga ntsena, Swi tano ni ku rhukana ka hava, a ku tirhi nchumu.

³Nkharisa wu fanele hanci, ni tomu mbhongolo, Ni nhonga nhlana wa xihunguki.

⁴U nga hlamuli xihunguki hi vuhunguki bya xona, U nga ti fana na xona.

⁵U hlamula xihunguki hi vuhunguki bya xona, Xi nga ti tshuka xi tipimisela wa vutlhari.

⁶La rhumaka timhaka hi xihunguki U titsema milenge, u nwa khombo.

⁷Hilaha milenge ya xilema yi lengalengaka ntsena, Ku vulavula ka vutlhari ku kota sweswo enon'wini wa xihunguki.

⁸Ku dzunisa xihunguki Swi fana ni ku bohelela ribye exipelupelwini.

⁹Ku vulavula ka tintlhari enon'wini wa xihunguki, I rhavi ra mitwa evokweni ra mupyopyi.

¹⁰Munhu la tholaka xihunguki ni mutsendzeleki, I mutameri wa vurha la tlhavaka vanhu.

¹¹Ku kota mbyana loko yi tlhela yi dya mahlanta ya yona, Xihunguki xi vuyela sweswo evuhungukini bya xona.

¹²Xana u vone munhu la tivonaka vutlhari? Wa rihuhu u tshembeka ku tlula yeloyi.

¹³Lolo ri ri: “Nghala yo dzumadzuma yi kona endleleni, Nghala yi kona emitsendzeleni!”

¹⁴Rivanti ra yindlu ri hundzuluka eswikhuleketweni swa rona, Ni lolo emasangwini ya rona.

¹⁵Lolo ri yisa voko enkambaneni, Kambe ri hluleka ku ri tlherisela enon'wini wa rona hi ku karhala.

¹⁶Lolo ri tivona ku tlhariha Ku tlula va ntlhanu na vambirhi lava hlamulaka swinene.

¹⁷Muhundzi wa ndlela la nghenaka etimholoveni ta van'wanana hi ku leva, U khoma mbyana hi tindleve.

¹⁸La dyelelaka warikwavo, U fana ni munhu wa nsele

¹⁹La hoxaka swisa, ni miseve, ni rifu, A ku: “A ndzo tlanga ntsena.”

²⁰Ndzilo wu timeka hi ku pfumala tihunyi; Swi tano ni timholovo, ti hela loko muhlevi ku ri hava.

²¹Makala ni tihunyi, swi tshivela ndzilo; Swi tano ni munhu wa timholovo, u pfurhisa ku holova.

²²Ku vulavula ka muhlevi i swakudya leswi xawulaka, Swi nghena, swi va swi nyupela endzeni ka marhumbu.

²³Milomu leyo nandziha ni mbilu yo biha, Yi kotisa mabuwu ya silivhere lama namekiweke ehenhla ka mbita ya vumba.

²⁴La vengaka u kanganyisa hi milomu ya yena, Embilwini u kanela ku dyelela;

²⁵Loko a vulavula hi vunene, u nga kholwi ha yena, Hikuva manyala ya ntlhanu na mambirhi ma le mbilwini ya yena.

²⁶Rivengo ri tifihla hi ku kanganyisa, Kambe ku biha ka rona ku ta tiviwa enhlengeletanweni.

²⁷La celaka rindzi u ta wela kona Ribye ri ta tlhelela eka loyi a ri khunguluxeke.

²⁸Ririmi ra vunwa ri venga lava pyanyiweke hi rona, Nomu wa ku xengetela wu vanga ku onhaka.