Read Xitsonga Proverbs 29 Bible Online

Proverbs 29 - Xitsonga bible

Proverbs 29

¹Munhu la fanelaka hi ku tshinyiwa, kutani a nonon'hwisa nhamu, U ta tshoveka kan'wekan'we, a ku nga vi na murhi wo n'wi tshungula.

²Siku lavo lulama va talaka, tiko ra tsaka, Kambe siku ku fumaka lowo biha, tiko ra rila.

³La rhandzaka vutlhari u tsakisa tata wa yena, Kambe la tsakelaka tinghwavava u onha rifuwo ra yena.

⁴Hi ku lulama, hosi yi tiyisa tiko, Kambe la amukelaka tinyiko wa ri hlanhla.

⁵Munhu la hlohlotelaka warikwavo U rhiya ntlhamu emilengeni ya yena.

⁶Exidyohweni xa munhu wo biha, Xirimbana xi kona, Kambe la lulameke u khana a tsaka.

⁷Munhu wo lulama u twisisa timhaka ta xisiwana, Kambe lowo biha a nga na vutivi byo twisisa.

⁸Vasandzi va pfurheta ndzilo emutini, Kambe lavo tlhariha va timela ku kariha.

⁹Munhu wo tlhariha la tengaka ni wa rihuhu, A nga ka a nga voni ku tsaka, hambi a kariha, hambi a hleka.

¹⁰Lava nga ni ndlala ya ngati, va venga vanhu lava hetisekeke, Kambe lavo lulama va sirhelela ku hanya ka vona.

¹¹Xihunguki xi humesa hinkwaswo swa mbilu ya yena, Kambe wa ku tlhariha wa tihlayisa ni ku tikhoma.

¹²Loko hosi yi yingisela mavunwa, Malandza ya yona hinkwawo ma hundzuka layo biha.

¹³Xisiwana ni muxanisi va hlangana eka xilo xin'we; I Yehovha la voningelaka mahlo ya vona havambirhi.

¹⁴Loko hosi yi avanyisela xisiwana hi ku lulama, Xitshamo xa yona xi ta tiya hi masiku.

¹⁵Nhonga ni ku tshinyiwa swi nyika munhu vutlhari; Kambe wandzisanyana la tifumaka, u khomisa mana wa yena tingana.

¹⁶Siku lavo biha va talaka, na kona ku homboloka ka tala; Kambe lavo lulama va ta hlalela ku wa ka vona.

¹⁷Laya n'wana wa wena, u ta ku nyika ku wisa, U ta tsakisa moya wa wena.

¹⁸Mahlori loko ku ri hava, a ku na nawu etikweni, Kambe siku ri hlayisaka milawu, ri katekile!

¹⁹Nandza a nga layiwi hi marito; Hikuva hambi a twisisa a nga hlamuri.

²⁰U tsundzukile xihatli xana? Xihunguki xi nga tshembeka ku tlula xona.

²¹Khumbi loko ri risiwa hi ku olova ra ha ri ntsongo Endzhaku ri ta tiendla un'wana wa vana va wena.

²²Munhu wo kariha u hlohlotela timholovo, Ni loyi a holovaka u andzisa swidyoho swa yena.

²³Ku tikukumuxa ka munhu ka n'wi tsongahata, Kambe wa mbilu yo titsongahata u ta fikela eku vonakaleni.

²⁴La pambulelanaka ni khamba u venga moya wa yena, U twa ku rhukana kambe a nga vuli nchumu.

²⁵Ku chava vanhu ka rhiya ntlhamu, Kambe la tshembaka Yehovha u le ku tlakukeni.

²⁶Lavo tala va lava ku voniwa hi hosi, Kambe ku avanyisa ka munhu ku huma eka Yehovha.

²⁷Xihunguki i manyala eka lavo lulama, Kutani la lulameke endleleni ya yena, i manyala eka munhu wo homboloka.