Read Xitsonga Proverbs 4 Bible Online

Proverbs 4 - Xitsonga bible

Proverbs 4

¹Vana, yingisani dyondzo ya tatana, Mi yi anakanya, mi ta kuma ku twisisa;

²Hikuva ndzi mi dyondzisa dyondzo leyinene: Mi nga tshiki tidyondzo ta mina.

³Hikuva na mina a ndzi ri n'wana wa xiviri eka tatana, N'wana la nga yexe la rhandziwaka hi manana,

⁴Tatana a ndzi dyondzisa, a ku eka mina: “Mbilu ya wena a yi hlayise marito ya mina; U yingisa ku lerisa ka mina, u ta hanya.

⁵Fuwa vutlhari, fuwa ku twisisa; U nga rivali marito ya nomu wa mina, u nga ma tshiki.

⁶U nga fularheli vutlhari, byi ta ku hlayisa; U byi rhandza byi ta ku hanyisa.

⁷Ku sungula ka vutlhari, i ku lava byona; U xava ku anakanya hi hinkwaswo leswi u nga na swona,

⁸Kurisa vutlhari, byi ta ku kurisa; Loko u byi namarhela, byi ta ku dzunisa,

⁹Byi ta ku bombisa nhloko hi xibombiso lexinene, Byi ta ku rhwexa harhi ya vuhosi yo kwetsima.”

¹⁰Yingisa, n'wananga, u amukela marito ya mina, Malembe ya ku hanya ka wena ma ta andzisiwa.

¹¹Hikuva ndzi ku dyondzisa ndlela ya vutlhari, Ndzi ku fambisa emitileni ya ku lulama.

¹²Loko u famba, u nga ka u nga kamiwi milenge, Loko u tsutsuma, u nga ka u nga khunguvanyeki.

¹³Khoma dyondzo, u nga yi tshiki, U yi hlayisa; hikuva i vutomi bya wena.

¹⁴U nga ngheni endleleni ya va nsele, U nga kandziyi emitileni ya lavo homboloka;

¹⁵Hundzuluka, u nga kongomi kona, U hambuka, u tifambela;

¹⁶Hikuva a va yi eku etleleni va nga si endla swo biha; Va nga ka va nga kumi vurhongo loko va nga si wisa munhu.

¹⁷Hikuva vuswa lebyi va byi dyaka, i swo biha, Kambe tihanyi i vhinyo leyi va yi nwaka.

¹⁸Ndlela ya lavo lulama yi kotisa ku vonakala, Ku hatima ka kona ku engeteleka ku fikela nhlekanhi lowukulu.

¹⁹Kambe ndlela ya vadyohi yi kotisa munyama, A va tivi laha va welaka kona.

²⁰N'wananga, yingisisa marito ya mina, U xiya timhaka ta mina.

²¹Ti nga suki emahlweni ya wena, U ti hlayisa embilwini ya wena;

²²Hikuva i vutomi eka hinkwavo lava ti kumaka, I ku tsaka ka miri hinkwawo wa vona.

²³Hlayisa mbilu ya wena ku tlurisa leswi hlayisiwaka, Hikuva i xihlovo xa vutomi.

²⁴U alela ririmi ro homboloka, U hambana ni milomu yo kanganyisa.

²⁵Mahlo ya wena a ma langute ma lulamile, Tinxiye ta wena a ti pfuleke hi ku lulama.

²⁶Anakanya ndlela ya nenge wa wena, Tindlela ta wena hinkwato ti ta tiya.

²⁷U nga tshuki u hambukela exineneni kumbe eximatsini, U tshineta nenge wa wena ekule ni leswo biha.