Read Xitsonga Proverbs 6 Bible Online

Proverbs 6 - Xitsonga bible

Proverbs 6

¹N'wananga, loko u tibohile hi nandzu wa warikwenu, Loko u nyikile voko ra wena ku tiyisa un'wana;

²Loko ku vula ka nomu wa wena ku ku phasile, Ni marito ya nomu wa wena ma ku bohile,

³N'wananga, endla sweswo, famba u ya tikutsula, Hikuva u le mandleni ya warikwenu; Famba, u khinsama, u tikhongelela eka warikwenu.

⁴U nga nyiketi mahlo ya wena vurhongo U nga pfumeleli tinxiye ta wena ti nembelela;

⁵U phonyoka kukota ntshembe emarindzini, Kukota nyanyana entlhan'wini wa muhloti.

⁶Wena lolo, yana eka vusokoti, U xiya mikhuva ya byona, u ta tlhariha.

⁷A byi na murisi, Hambi mukamberi, kumbe hosi;

⁸Byi tilunghisela swakudya swa byona hi ximumu, Byi tihlengeletela mphamo loko ku tshoveriwa.

⁹Wena lolo, u ta etlela ku yisa kwihi xana? U ta pfuka rini evurhongweni bya wena?

¹⁰Ku etlelanyana, ku khudzehela switsanana, Ku tilata nkarhinyana hi ku khondla mavoko!

¹¹Vusiwana bya wena byi ta ku wonga kukotisa muendzi, Ni ndlala, kukotisa munhu la hlomeke.

¹²I munhu wa hava, wo homboloka, La fambaka hi nomu wa ku kanganyisa;

¹³A copeta mahlo, a vulavula hi milenge, A encanyeta timhaka hi tintiho;

¹⁴Mbilu ya yena yi onhakile, Yi kanela swo biha hi masiku, Yi kucetela ku hambana.

¹⁵Hikwalaho ku onhaka ka yena ku ta n'wi tshukisa, U ta lova hi nomu lowu, ku nga ri na murhi.

¹⁶Ku ni swilo swa ntlhanu na xin'we leswi vengiwaka hi Yehovha, Ndzi ri ntlhanu na swimbirhi lama nga manyala eka yena:

¹⁷I mahlo yo tikukumuxa, ni ririmi ra vunwa, Ni mavoko lama halataka ngati leyi nga riki na nandzu;

¹⁸I mbilu leyi kanelaka swo biha, Ni milenge ya matsambu leyi tsutsumelaka eku biheni.

¹⁹I mbhoni ya vunwa leyi vulaka mavunwa, Ni la pfuxaka timholovo exikarhi ka vamakwavo.

²⁰N'wananga, hlayisa milawu ya tata wa wena, U nga fularheli dyondzo ya mana wa wena,

²¹U yi bohelela embilwini ya wena hi masiku, U yi tsimba enhan'wini ya wena.

²²Loko u famba, yi ta ku fambisa, Ni loko u etlela, yi ta ku rindza; Loko u pfuka evurhongweni yi ta vulavula na wena.

²³Hikuva xitsundzuxo i rivoningo, ni dyondzo i ku vonakala, Ku tshinya ka ku laya i ndlela ya vutomi:

²⁴Swi ta ku chavisa nsati lowo biha, Ni ririmi ra mandzendze ra nghwavavana,

²⁵U nga tshiki mbilu ya wena yi navela vubombi bya yena, U nga kokiwi hi tinxiye ta yena.

²⁶Hikuva hi nsati wa mbiri, munhu u sala ni xipandzwa xa vuswa ntsena, Ni nsati wa munhu a etlelela vutomi bya risima.

²⁷Xana munhu a nga okela makala exifuveni, Tinguvu ta yena ti nga tshwi-ke?

²⁸Xana munhu a nga kandziya makala, Mikondzo ya yena yi nga dzuvuki xana?

²⁹Swi endlisa sweswo eka la yaka eka nsati wa warikwavo, Mani na mani la n'wi khumbaka a nga pfumali nandzu.

³⁰A va nyenyi muyivi loko a yiva Ku tixurhisa loko a ri ni ndlala.

³¹Kambe siku a khomiwaka u fanela ku riha kantlhanu na kambirhi; A ta humesa xuma hinkwaxo xa yindlu ya yena.

³²La oswanaka ni wansati u heleriwe hi ku anakanya, La endlaka sweswo u lovisa moya wa yena;

³³U ta kuma ku biwa, ni tingana; Ku sandziwa ka yena ku nga ka ku nga susiwi.

³⁴Hikuva mavondzo ma karihisa wanuna, U ta pfumala tintswalo siku a tirihiselaka.

³⁵A nga ka a nga amukeli miriho, Vukari bya yena a byi lamuriwi, hambi u humesa xuma lexo tala.