Read Xitsonga Ecclesiastes 12 Bible Online

Ecclesiastes 12 - Xitsonga bible

Ecclesiastes 12

¹Anakanya Muvumbi wa wena hi masiku ya vuntshwa bya wena, ku nga si ta masiku ya khombo, ku nga si fika ni malembe lawa u nga ta vula ha wona, u ku: “A ndza ha tsakisiwi ha wona,”

²ku nga si nyama dyambu, ni ku vonakala, ni n'weti, ni tinyeleti, ni mapapa ma nga si landzela mpfula;

³ku nga si fika siku leri valanguteri va yindlu va nga ta rhurhumela, ni vavanuna va tinhenha va nga ta korhama, ni lava silaka va nga ta yima, hikuva ntsengo wa vona wu hungutekile, ni lava langutaka hi mafasitere va nga ta nyamisiwa;

⁴ni timbanti timbirhi ti nga ta pfariwa etsendzeleni; siku mpfumawulo wa ku sila wu nga ta hunguteka; siku ku nga ta pfukiwa hi ku rila ka tinyanyana; siku ku nga ta karhala swiyimbeleri hinkwaswo;

⁵siku vanhu va nga ta chava ku ya eswivandleni leswi tlakukeke, ku nga ta chaviwa etindleleni; siku murhi wa alimondi wu nga ta baleka, ni mherha yi nga ta tika, ni munhu a nga ta phirwa hi swakudya; siku munhu a nga ta tiyela endlwini ya yena ya makumu, ni varili va nga ta rhendzeleka emitsendzeleni.

⁶Ringhole ra silivhere ri nga si tshunxiwa, ni ximbitana xa nsuku xi nga si fayeka, ni khuwana ri nga si fayeka exihlobyeni lexi pfelelaka, ni sondzo ri nga si fayiwa ekheleni;

⁷ni ntshuri wu nga si tlhelela emisaveni laha wu humeke kona, ni moya wu nga si tlhelela eka Xikwembu lexi nyikeke wona.

⁸Vuhava bya swahava, ku vula Mudyondzisi, hinkwaswo i swahava.

⁹Mudyondzisi a va a tlharihile; a engeta kambe a dyondzisa tiko ku tlhariha, kutani a vutisisa, a lavisisa a lunghisa marito layo tala ya vutlhari.

¹⁰Mudyondzisi u chivirike ku kuma swihlambanyiso leswi tsakisaka, kutani leswi tsariweke hi ku lulama, i marito ya ntiyiso.

¹¹Marito ya lavo tlhariha, ma fana ni tinsungunhu, loko ma hlengeletiwa ma fana ni timhingu leti gongondzeriweke. Va nyikiwile hi Murisi a ri un'we.

¹²Oho! N'wananga, wa nga tsundzuxiwa hi vona, hikuva a ku na ku hela eku endleni ka tibuku leto tala, kutani ku dyondza ngopfu ku karhata nyama.

¹³A hi yingiseni makumu ya timhaka hinkwato: Chava Xikwembu, u hlayisa milawu ya xona, hikuva hi yona mfanelo hinkwayo ya munhu;

¹⁴hikuva Xikwembu xa ha ta yisa mitirho hinkwayo eku avanyiseni ni leswi fihliweke hinkwaswo, hambi swi ri leswo biha, hambi swi ri leswo saseka.