Read Xitsonga Ecclesiastes 6 Bible Online

Ecclesiastes 6 - Xitsonga bible

Ecclesiastes 6

¹Mhaka leyo biha yi kona leyi ndzi yi voneke ehansi ka dyambu yi andzile exikarhi ka vanhu:

²Hi leswaku loko Xikwembu xi nyikile munhu rifuwo, ni xuma, ni ku twala, ku fikela loko a nga ha pfumali nchumu eku hanyeni ka yena, hambi xi ri xilo xin'we xa hinkwaswo leswi a swi navelaka, Xikwembu a xi n'wi nyiki nkarhi wa ku dya swona, i un'wana la swi dyaka. Swoleswo i vuhava ni khombo leri vavisaka.

³Hambiloko munhu a nga veleka vana va dzana, a hanya malembe layo tala, ni loko masiku ya malembe ya yena ma andzisiwa, loko moya wa yena wu nga xurhi vunene, a va a pfumala ni sirha: ndzi ri, swi tsandza ni la velekiweke wu nga si va nkarhi, u n'wi tlula hi ku kateka.

⁴Hikuva u velekeriwe swahava, u famba emunyameni, kutani vito ra yena ri funengetiwa hi munyama;

⁵u ta va la nga vonangiki dyambu ni ku ri tiva a nga ri tivi. Yena u ni ku wisa ku tlula munhu yeloyi.

⁶Hambiloko a hanyile malembe ya khume ra madzana lama hlayiwaka kambirhi, kambe a nga voni ku kateka, andziri hinkwaswo a swi fambi endhawini yi ri yin'we xana?

⁷Ntirho hinkwawo wa munhu wu yisiwa enon'wini wa yena, hambiswiritano, ku navela ka yena a ku xurhi.

⁸Xana lowo tlhariha u tlula xihunguki ha yini? Kumbe xisiwana lexi tivaka ku tifambela emahlweni ka lava hanyaka, xi fuwa yini?

⁹Lexi voniwaka hi mahlo xi sasekile, ku ri ni lexi anakanyiwaka hi mbilu. Xolexo, na xona, i vuhava, ni ku landza mheho.

¹⁰Lexi nga kona xi thyiwile vito; loko a ri munhu, ku tiviwa lexi a nga xona ni leswaku a nga ka a nga tengisani na la n'wi tlulaka hi matimba.

¹¹Langutani, ku ni swilo leswo tala leswi andzisaka swahava; loko swi ri tano, munhu a nga fuwa yini ha swona?

¹²Hikuva i mani la tivaka leswi nga saseka eka munhu evutomini bya yena, hi masiku ya ku hanya ka yena ka swahava lama hundzaka kukota ndzhuti? Kumbe i mani la byelaka munhu leswi nga ta va kona ehansi ka dyambu, loko a nga ha ri kona?