Read Xitsonga Song of Solomon 3 Bible Online

Song of Solomon 3 - Xitsonga bible

Song of Solomon 3

¹Loko ndzi ri le vulawini bya mina nivusiku, Ndzi n'wi anakanya la rhandziwaka hi moya wa mina; Ndzi n'wi lavile, kambe a ndzi n'wi kumanga.

²Ndzi ta pfuka sweswi, ndzi fambafamba emutini, ni le mitsendzeleni ni le tindleleni; Ndzi n'wi lava la rhandziwaka hi moya wa mina; Ndzi n'wi lavile kambe a ndzi n'wi kumanga!

³Varindzi lava fambafambaka emutini va ndzi kuma: “Xana mi n'wi vonile la rhandziwaka hi moya wanga?”

⁴Ndza ha ku va hundza switsanana, Ndzi kuma la rhandziwaka hi moya wanga, Ndzi n'wi khoma, kambe a ndzi n'wi tshikanga. Ndzi kondza ndzi n'wi yisa endlwini ya manana, Endlwini ya la nga ndzi veleka.

⁵Vanhwanyana va Yerusalema, ndzi mi hlambanyisa Hi timhala ni timbavala ta le nhoveni, Leswaku mi nga n'wi hiti, hambi ku n'wi pfuxa, Murhandziwa wa mina, a nga si swi rhandza.

⁶I mani loyi a humelelaka emananga Ku fana ni hunguva ya musi, La nun'hwelaka hi mirha ni mirhi ya risuna, Ni maakha hinkwawo ya vaxavisi xana?

⁷Langutisa vulawu bya yena, byi nga bya Solomoni, Byi rhendzeriwe hi vavanuna va makume ya ntlhanu na rin'we, Ti nga tinhenha ta Israele,

⁸Hinkwavo va tamela matlhari, Va nga lava lulameleke hi ku lwa; Hinkwavo va ni matlhari ya vona eswifungheni swa vona Hikwalaho ka ku chava nivusiku.

⁹Hosi Solomoni a tiendlele byetlelo hi mirhi ya Lebanoni.

¹⁰U endle timhandze ta byona hi silivhere, Ni xiseketelo xa byona hi nsuku, Xiandlalo xa byona a xi ri xa xivunguvungu; Exikarhi ka byona ku andlaleriwe hi ntirho wa rirhandzu Ra vanhwanyana va le Yerusalema.

¹¹Humani, n'wina vanhwanyana va le Siyoni, Mi ya hlalela hosi Solomoni, Ni harhi ya vuhosi leyi a nga vehela hi mana wa yena, Hi siku ra ku teka ka yena, Ni siku ra ku tsaka ka mbilu ya yena.