Read Xitsonga Isaiah 17 Bible Online

Isaiah 17 - Xitsonga bible

Isaiah 17

¹“Vonani, Damaska u ta tshikiwa ku vuriwa muti, u ta va nhulu ya marhumbi.

²Miti ya Arowere yi tshikiwile, yi endliwe madyelo ya mitlhambi leyi vundzaka kona, yi nga hlongoriwi hi munhu.

³Khokholo ri susiwa eka Efrayimi, ni vuhosi eka Damaska: Leswi nga ta sala etikweni ra Siriya swi ta fana ni ku vonakala ka vana va Israele,” ku vula Yehovha wa tinyimpi.

⁴“Enkarhini lowo ku vonakala ka Yakobo ku ta hunguteka, ni ku kuluka ka miri wa yena ku ta ondza.

⁵Ku ta fana ni mutshoveri loko a hlengeleta tinhi ni loko voko ra yena ri tsema min'oko enkoveni wa Varefayimi.

⁶Ku ta sala nkun'hulo tanihi loko va hlakahla mutlhwari, loko ku sala mihandzu mimbirhi, kumbe minharhu eswicapilweni, hambi mune kumbe ntlhanu emarhavini ya murhi lowu vekaka ngopfu,” ku vula Yehovha, Xikwembu xa Israele.

⁷Hi siku rero munhu u ta languta eka Muvumbi wa yena, mahlo ya yena ma ta languta eka Mukwetsimi wa Israele.

⁸A nga ka a nga cingeri tialitari leti tirhiweke hi mavoko ya yena; a nga ka a nga languti leswi endliweke hi tintiho ta yena, hambi swi ri swifaniso swa Axera ni swa dyambu.

⁹Hi siku rero, miti ya yena ya makhokholo ma ta fana ni rhumbi leri nga exihlahleni, ni le tinhlohlorhini ta tintshava, leri siyiweke emahlweni ka vana va Israele; ku ta va mananga.

¹⁰Hikuva u rivarile Xikwembu lexi ku ponisaka, a ku anakanyanga ribye ra khokholo ra wena; hikwalaho i ngi u rimile mitanga leyi tsakisaka, u simeka ni mirhi ya vhinya ya misava yin'wana.

¹¹Siku u simekaka, u biyela, kutani nimixo u balekisa timbewu, kambe ku tshovela ku ku sukela hi siku ra vuvabyi ni ra ku vaviseka loku dlayaka.

¹²Yo! Mpfumawulo wa matiko layo tala! Wa pfuma tanihi lwandle! Yo! Pongo ra matiko! Ma pfuma tanihi mati lamakulu.

¹³Matiko ma pfuma kukotisa mati lamakulu! Xikwembu xi ma tshinya kutani ma balekela ekule; ma hangalasiwa hi moya tanihi mungu etintshaveni, tanihi ntsutsungwana emahlweni ka xidzedze.

¹⁴Nimadyambu a hi ku chava ka vona! Dyambu ri nga si tsuvuka, a va ha ri kona!

¹⁵Hi kona ku averiwa ka lava hi phangaka ni ku hanya ka lava hi hlaselaka.