Read Xitsonga Isaiah 18 Bible Online

Isaiah 18 - Xitsonga bible

Isaiah 18

¹Yo! Tiko ra ku tsavatela ka timpapa entsungeni wa milambu ya Kuxi;

²wena la rhumaka tintsumi elwandle hi mabarika ya mavundzu ehenhla ka mati! Fambani, n'wina malandza ya matsambu eka tiko ra vanhu va xiyimo xo leha, lava byewuriweke, tiko leri chaviwaka kule mpfhuka ri nga tiko ni namuntlha, tiko ra matimba, leri fayaka hinkwaswo, leri nga ni milambu leyo tala.

³N'wina hinkwenu lava akeke ematikweni hinkwawo, na n'wina vanhu va misava, kutakuloko mujeko wu yimisiwe ehenhla ka tintshava, langutani! Kutakuloko nanga yi yimbiwa, mi yingisela!

⁴Hikuva Yehovha u ndzi byerile, a ku: “Ndzi ta miyela, ndzi languta ndzi ri le ndlwini ya mina, tanihi mumu lowu nandzihaka loko dyambu ri xile, tanihi hunguva ya mberha enkarhini wa ximumu loko ku tshoveriwa.”

⁵Hikuva loko ku nga si tshoveriwa, loko xiluva xi wile, xi hundzukile xidzumba lexi vupfeke, u ta tsema marhavi hi mukwana; a va a susa, a tsema misinya.

⁶Hinkwavo va ta nyikiwa makoti ya tintshava, ni swivandzana swa nhova. Makoti ma ta dya hi ximumu, ni swivandzana swi dya hi vuxika.

⁷Enkarhini wolowo, ku ta tiseriwa Yehovha wa tinyimpi nhlengo hi tiko ra vanhu va xiyimo xo leha, lava byewuriweke, lava chaviwaka ekule mpfhuka va nga tiko, tiko ra matimba, leri fayaka hinkwaswo, tiko ra milambu leyo tala, swi ta tisiwa laha Yehovha wa tinyimpi a khongeriwaka kona, entshaveni ya Siyoni.