Read Xitsonga Isaiah 22 Bible Online

Isaiah 22 - Xitsonga bible

Isaiah 22

¹Swi lo yini leswi vanhu hinkwavo va wena va tlhandlukeleke ehenhla ka tindlu,

²wena muti wa huwa, wa dzolonga, muti lowu titsakelaka? Kasi lava feke va wena a va tlhaviwanga hi fumu, a va fanga enyimpini!

³Tindhuna ta wena hinkwato ti balekile swin'we; ti khomiwile ku nga kongiwanga vurha, vanhu va wena hinkwavo va tshuka va khomiwa swin'we va ri karhi va tsutsuma ekule!

⁴Hikwalaho ndzi nge: Susani eka mina mahlo ya n'wina, ndzi ta tiva ku rila hi xivitwana! Mi nga hatliseni ku ndzi chavelela hikwalaho ka ku onhaka ka wanhwana wa tiko ra mina!

⁵Hikuva i siku ra nkitsikitsi, ra ku onhaka, ra ku pyatsapyatseka, leri rhumiweke hi Hosi, Yehovha wa tinyimpi, enkoveni wa swivono; rirhangu ri wisiwa ehansi, kutani huwa ya nkosi yi ya fika entshaveni.

⁶Elamu u tamele gadzi, ku humelela tigolonyi leti teleke tinhenha, ni vakhandziyi va tihanci; Kiri u hlomile switlhangu.

⁷Mikova ya wena leyi tlurisaka hi ku saseka, yi tele tigolonyi; lava khandziyaka tihanci va ku bvutamele etinyangweni ta wena.

⁸Rirhangu ra Yuda ri mbundzuxiwa; hi siku lero u langutile tlhelo ra mpalana ya xiluvelo xa le xihlahleni.

⁹Mi vonile rirhangu ra muti wa Davhida leswaku timbhovo ta wona ti tele, kutani mi sivile mati ya tiva ra le nkoveni.

¹⁰Mi hlayile tindlu ta Yerusalema, mi mbundzuxa tin'wana, mi tiyisa rirhangu hi maribye ya rona.

¹¹Kutani mi endle tiva exikarhi ka makhumbi mambirhi, mi hlengeleta kona mati ya tiva ra khale. Kambe a mi langutisanga eka Muendli wa timhaka teto, a mi vonanga loyi a ti kungeleke khale.

¹²Hosi, Yehovha wa tinyimpi, u mi vitanele hi siku lero eku rileni ni ku tiba swifuva, ku byewula misisi ni ku ambala nguvu leyo khwaxa.

¹³Kasi, maswivo, i nkhuvo ni ku tsaka! Ku tlhaviwa tihomu ku tlhaviwa tinyimpfu; ku dyiwa tinyama, ku nwiwa vhinyo: mi ku: “A hi dyeni, a hi nweni, hikuva mundzuku hi ta fa!”

¹⁴Yehovha wa tinyimpi u ndzi hleverile, a ku: “Hakunene, ku dyoha loku mi nga ka mi nga ku khomeriwi, mi ta ondza mi fa, ku vula Hosi, Yehovha wa tinyimpi.”

¹⁵Hosi Yehovha wa tinyimpi u vurile, a ku: “Suka u ya eka muhlayisi wa rifuwo, eka Xebina, mulanguteri wa yindlu ya vukosi, u ku eka yena:

¹⁶“ ‘U na yini kwala, u na mani kwala, leswi u tiendlelaka sirha kwala! U tivatlela sirha eswitsungeni, u tiendlela ndhawu eribyeni!’

¹⁷Waswivo, Yehovha u ta ku khoma, a ku cukumetela ekule hi matimba,

¹⁸a ku vumbuluxa, u vumbuluka kukotisa xirhendzevutana etikweni leri anameke, leri pfulekeke. U ta fela kona; tigolonyi ta ku saseka ta wena ti ta hela kona, wena, tingana ta yindlu ya hosi ya wena!

¹⁹Ndzi ta ku hlongorisa entirhweni wa wena, u ta susiwa exitshan'weni xa wena.

²⁰“Kutani hi siku lero ndzi ta vitana nandza wa mina Eliyakimi, n'wana Hilkiya;

²¹ndzi n'wi ambexa nguvu ya wena, ndzi n'wi boha vamba ra wena, ndzi veka ku fuma ka wena evokweni ra yena. Kutani u ta va tatana eka vaaki va Yerusalema, ni ka yindlu ya Yuda.

²²Ndzi ta veka mpfungura wa yindlu ya Davhida ekhatleni ra yena; u ta pfula, kutani a ku na la nga ta pfala; u ta pfala, kambe a ku na la nga ta pfula.

²³Ndzi ta n'wi tlhoma kukotisa mhingu laha ku tiyeke; u ta va xitshamo lexi kwetsimaka endlwini ya tata wa yena.

²⁴U ta va phandze ra ku twala hinkwako ka yindlu ya tata wa yena, ri ri phandze ra rixaka ra yena ni vatukulu va yena, ku ya fika eka swimbitana hinkwaswo, ku suka eka mindzheko, ku fika eka timbita hinkwato, ku suka eka mindzheko, ku fika eka swikutsu.

²⁵“Hi siku lero, ku vula Yehovha wa tinyimpi, mhingu leyi tlhomiweke laha ku tiyeke yi ta susiwa, yi hlomuriwa, yi wa, kutani hinkwaswo leswi hayekiweke eka yona swi ta herisiwa, hikuva Yehovha u vurisile.”