Read Xitsonga Isaiah 23 Bible Online

Isaiah 23 - Xitsonga bible

Isaiah 23

¹Vovolani n'wina, tingalava ta Tarxixi, hikuva u lovile! Tindlu, ku hava! A ka ha ngheni munhu kona! Mahungu lawa ma huma etikweni ra Kitimi.

²Miyelani, n'wina vaaki va ribuwu leri nga hlanganeriwa hi vapindzuri va Sidoni, vatsemakanyi va lwandle.

³A va tsemakanya mati lamakulu; koro ya Nilo, ni leswi tshoveriweke enambyeni a ri ri bindzu ra Tiri; hi kona vamatiko va nga xavelana kona.

⁴U va ni tingana, Sidoni, hikuva lwandle ni khokholo ra lwandle ri vurile, ri te: “A ndzi lumiwanga, a ndzi velekanga; a ndzi kurisanga timbhuri, a ndzi wundlanga vanhwana.”

⁵Loko Egipta a ti twa, u ta rhurhumela hi timhaka ta Tiri.

⁶Pelelani eTarxixi, vovolani, n'wina va xihlale.

⁷Xana hi kona ku hela ka muti lowu tsakeke wa n'wina lowu ngi wu ri ni masungulo ya khale, lowu mikondzo ya wona yi nga wu yisa ekule ku aka kona?

⁸I mani la kaneleke swona ehenhla ka Tiri, yena loyi a nga va lukela maharhi ya vuhosi, loyi vapindzuri va yena ingi va ri tihosi, ni vaxavisi va yena ingi va ri vafundziwa va misava xana?

⁹I Yehovha wa tinyimpi la kaneleke swona, a ta vunisa ku tikukumuxa ka hinkwaswo leswi vangamaka, ni ku tsongahata hinkwavo vakulukumba va misava.

¹⁰Fafamela etikweni ra wena hi ku tsaka, u kotisa nambu wa Nilo, wena, n'wana wa Tarxixi: a wa ha bohiwanga hi timpecana.

¹¹Xikwembu xi tshambulute voko ra xona ehenhla ka lwandle, xi rhurhumerisa vuhosi: Yehovha u lerisile ku mbundzuxiwa ka makhokholo ya Kanana,

¹²u te: “A ku nga ha tsaki, wena, nhwanyana la onhakeke, n'wana wa Sidoni! Pfuka, pelela eKitimi na kona u nga ka u nga voni ku wisa!”

¹³Vona, tiko ra Vakalediya, leri ngi ri nga ri tiko; Asiriya u ri nyikile swivandzana swa nhova; va akile makhokholo ya vona ya tinyimpi va onhe tindlu ta vuhosi bya Ninivha, va ti endle marhumbi.

¹⁴Vovolani n'wina, tingalava ta Tarxixi, hikuva khokholo ra n'wina ri onhakile!

¹⁵Enkarhini wolowo ku ta humelela leswaku Tiri u ta rivariwa hi malembe ya ntlhanu wa makume na makume mambirhi, ku ringana masiku swa hosi. Kutani malembe ya ntlhanu wa makume na makume mambirhi loko ma hundzile, Tiri u ta fikeleriwa hi risimu ra nghwavava, leri nge:

¹⁶“Teka xitendze, u rhendzeleka ni muti, wena nghwavava la rivariweke! Yimba swinene, u engetela tinsimu, leswaku u anakanyiwa!”

¹⁷Kutani, malembe ya ntlhanu wa makume na makume mambirhi loko ma hundzile, Yehovha u ta endzela Tiri, a ta engeta a lava hakelo ya yena, a ta endla vuoswi ni matiko hinkwawo lama nga ehenhla ka misava.

¹⁸Kambe bindzu ra yena ni ku hakela ka yena swi ta hlawuleriwa Yehovha: swi nga ka swi nga hlengeleteriwi kun'we, hambi ku ri ku vekiwa; hikuva rifuwo ra yena ni bindzu swi ta va swa lava akeke emahlweni ka Yehovha; hileswaku va ta dya, va xurha, va funengela leswo saseka ngopfu.