Read Xitsonga Isaiah 24 Bible Online

Isaiah 24 - Xitsonga bible

Isaiah 24

¹Vonani, Yehovha u ta onha tiko ri hundzuka mananga; u ta onha nghohe ya rona, a hangalasa vaaki va rona.

²Muprista u ta va tanihi munhu wa tiko; hosi yi ta fana ni nandza, muntsindza u ta va tanihi khumbi ra yena, muxavisi tanihi muxavi, mulombi tanihi mulombiwa, ni loyi ku nga tekiwa nandzu eka yena, a va tanihi loyi a nga ni nandzu.

³Misava yi ta va mananga, mananga ma ta hlaseriwa kunene, hikuva i Yehovha la vuleke rito lero.

⁴Tiko ri le nkosini ni le nhlomulweni; misava yi tsanile, yi ni gome, vakulu va tiko va pfumala matimba.

⁵Misava yi onhiwe hi vaaki va yona, hikuva va tlule milawu, va dyohele ku lerisa va tshikile xinakulobye lexi nga heriki.

⁶Hikwalaho ku rhuketeriwa ku dye tiko, vaaki va rona va biwile; hikwalaho vaaki va tiko va lovisiwaka, lava seleke a hi vangani.

⁷Vhinyo ya rila, murhi wa vhinya wa vuna; hinkwavo lava tsakeke va konya.

⁸Ku tsaka ka swingomana ku herile, mikulungwana ya mikhuvo a ya ha ri kona, mpfumawulo lowu tsakisaka wa switendze wu miyele;

⁹a ka ha nwiwi vhinyo hi ku yimbelela; byalwa bya bava eka lava byi nwaka.

¹⁰Muti wu onhakile, i rhumbi ntsena; yindlu yin'wana ni yin'wana yi pfariwile, a ta ha ngheniwi.

¹¹Va rila emitsendzeleni hikuva ku hava vhinyo; ku tsaka ku tlhakile; mikhuvo ya tiko yi herile!

¹²Ku sele marhumbi ntsena, emutini rivanti ri fayiwile, ri herile.

¹³Hikuva emisaveni, exikarhi ka matiko, swi fana ni loko ku khiwa mihandzu ya mitlhwari, ni loko ku kunhuriwa tivhinya.

¹⁴Va ta tlakusa marito ya vona, va ta ba mikulungwana ya ku tsaka; lava nga ekusuhi ni lwandle va ta khanela vuhosi bya Yehovha va ku:

¹⁵“Dzunisani Yehovha ematlhelweni ya vuxa, ni vito ra Yehovha, ra Xikwembu xa Israele, eswihlaleni swa vupeladyambu.

¹⁶Emakun'wini ya misava hi twile tinsimu leti nge: ‘Ku kwetsima eka mululami!’ ” Kambe mina ndzi ku: “Ndzi lovile, ndzi lovile! Ndzi ni khombo! Vaxengi va xenga, vaxengi va xenga ni ku xenga.”

¹⁷Nchavo ni rindzi ni ntlhamu swi le henhla ka wena, muaki wa tiko!

¹⁸La nga ta baleka hi nchavo, u ta wela erindzini; la nga ta huma erindzini, u ta phasiwa entlhan'wini; hikuva miseledyana ya matilo ya pfuleka, masungulo ya misava ma endla xirhendzeveti.

¹⁹Misava yi hlanhleka hi matimba, misava yi ngandzavanyeka, misava yi tsekatseka.

²⁰Misava yi dedeleka tanihi mupyopyi, yi ludzula tanihi ntsonga; yi tikeriwa hi xidyoho xa yona, yi wa, yi nga ha pfuki.

²¹Hi siku rero Yehovha u ta avanyisa le tilweni mavandla ya le henhla ni tihosi ta la ehansi emisaveni.

²²Ti ta pfaleriwa swin'we erindzini, ti ta khotsiwa ekhotsweni; kuteloko ku hundze nkarhi wo leha, ti ta biwa.

²³Kutani n'weti wu ta tshwuka hi tingana, dyambu rona ri ta endla ntima, hikuva Yehovha wa tinyimpi u ta fuma entshaveni ya Siyoni ni le Yerusalema, kutani vakulukumba va yena va ta vona ku vonakala ka yena.