Read Xitsonga Isaiah 25 Bible Online

Isaiah 25 - Xitsonga bible

Isaiah 25

¹Oho Yehovha! U Xikwembu xa mina, ndzi ta ku dzunisa; ndzi ta twarisa vito ra wena, hikuva u endlile leswi hlamarisaka. Makungu ya wena ya khale ma tshembeka, ma tiyile.

²Hikuva hi muti u endlile nhulu ya maribye, hi muti wa khokholo u endlile rhumbi; vuako bya vamatiko a bya ha ri muti, a byi nga ha pfuxiwi.

³Hikwalaho matiko lama nga ni matimba ma ku dzunisa, miti ya vamatiko lava nga ni matimba ya ku chava.

⁴Hikuva u xichavelo xa lava tsaneke, ni xichavelo xa xisiwana emapfalweni ya xona, ni xisirhelo hi siku ra xidzedze, ni ndzhuti loko dyambu ri hisa, hikuva moya wa vaxanisi wu kotisa xidzedze lexi solovanyaka khumbi.

⁵U tsongahatile pongo ra vamatiko, tanihi mumu loko wu phumerisiwa etikweni leri omeke; risimu ro khana ra vamatimba ri tsongahatiwa tanihi risana loko ri siveriwa hi ndzhuti wa papa.

⁶Yehovha wa tinyimpi u ta lunghisela matiko hinkwawo entshaveni leyi, swakudya swa tinyama leti noneke, ni swakunwa swa tivhinyo leti tengeke, leti kumiwaka ehenhla ka xisense; ti ri tinyama leti noneke, leti teleke, ni mafurha, ni tivhinyo ta khale leti tengisiweke.

⁷Entshaveni leyi, u ta handzula nturhu lowu sirheleke matiko hinkwawo, ni nkumba lowu funengetaka matiko hinkwawo.

⁸U ta lovisa rifu hilaha ku nga heriki: Hosi, Yehovha u ta hlangula mihloti emimombyeni hinkwayo; u ta sula tingana ta tiko ra yena hinkwaro, hikuva Yehovha u vurisile.

⁹Hi siku lero va ta ku: “Vonani, hi xona Xikwembu xa hina; hi tshembile xona, kutani xi hi ponisile! Hi yena Yehovha loyi hi n'wi tshembeke; a hi tsakisiseni hi tsakela ku ponisa ka yena!”

¹⁰Hikuva voko ra Yehovha ri ta tlhandlekiwa ehenhla ka ntshava leyi; kambe Mowabu u ta kandziyeriwa laha a nga kona, tanihi mungu wa koro loko wu gandleteriwa endzhopeni wa vulongo;

¹¹exikarhi ka wona u ta tshambuluta mavoko tanihi xihlambi loko a hlamba, kambe ku tikurisa ka yena ku ta tsongahatiwa a nga koti nchumu hi mavoko.

¹²Kutani Yehovha u ta mbundzuxa khokholo ra rirhangu ra wena leri tlakukeke u ta ri solovanya, a ri wisela ehansi entshurini.