Read Xitsonga Isaiah 28 Bible Online

Isaiah 28 - Xitsonga bible

Isaiah 28

¹Khombo ri ni xintlontlo lexi tiarisaka xa vapyopyiwa va Efrayimi, khombo ri ni xiluva lexi vuneke byi nga vubombi bya vona, ehenhla ka nkova lowu noneke wa lava hluriwaka hi vhinyo!

²Vonani, Hosi yi rhuma nala wa matimba la nga hluriwiki ha nchumu, la fanaka ni bubutsa ra xihangu, tanihi ndhambi ya mati lamakulu lama fafamelaka hinkwako, u ta xi cukumeta ehansi hi voko ra yena.

³Xintlontlo lexi tiarisaka xa vapyopyiwa va Efrayimi xi ta kandziyeriwa hi milenge;

⁴xi ta fana ni xiluva lexi vuneke, vubombi bya vona enhlohlorhini ya nkova lowu noneke, xi ta fana ni kuwa ro rhangela ximumu; kakuloko muhundzi a ri vona, a tshambuluta voko, a kha, a ri mita.

⁵Esikwini rero, Yehovha wa tinyimpi u ta va yena xintlontlo xa vubombi lexi vonakalaka, ni harhi ya vuhosi leyo kwetsima eka masalela ya tiko ra yena;

⁶a va moya wo lulamisa la tshamaka a avanyisa, ni matimba ya lava hlongorisaka valala ku yisa enyangweni ya muti wa vona.

⁷Kambe na vona va voyavoyamela evhinyweni, va solovanya hi byalwa; muprista ni muprofeta va dedeleka ebyalweni, va nwela evhinyweni, va solovanya loko va profeta, va dedeleka; loko va avanyisa, va voyama.

⁸Matafula hinkwawo ma tele mahlanta ni thyaka, ku nga siyiwangiki ndhawu!

⁹“U ta dyondzisa mani vutlhari xana? U ta dyondzisa mani tidyondzo-ke? Xana i swihlangi leswa ha ku lumuriwaka, leswi susiweke eveleni?

¹⁰Hikuva i nawu ehenhla ka nawu ni nawu ehenhla ka nawu, ku lerisa ehenhla ka ku lerisa, ni ku lerisa ehenhla ka ku lerisa, mhaka yin'wana ehenhla ka ku lerisa, mhaka yin'wana sweswi, ni mhaka yin'wanyana endzhaku.”

¹¹Hilaha Yehovha a nga ta vulavula ni tiko leri hi vanhu va manghanghamela, ni vanhu lava dyondzisaka hi ririmi rimbe, hi tiko leri a nga ri byela, a ku:

¹²“La, i ndhawu ya ku wisa; tsetselelani lava karheleke, halenu i ku rhula!” Kambe ri arile ku twa.

¹³Hikwalaho rito ra Yehovha ri ta va eka vona nawu ehenhla ka nawu, ni nawu ehenhla ka nawu, ku lerisa ehenhla ka ku lerisa, ni ku lerisa ehenhla ka ku lerisa, mhaka yin'wana sweswi ni mhaka yin'wanyana endzhaku leswaku loko va famba, va wa hi le ndzhaku va tshoveka, va phasiwa, va khomiwa!

¹⁴Hikwalaho, twanani rito ra Yehovha, n'wina vahleki lava fumaka tiko leri ra Yerusalema!

¹⁵Mi ri: “Hi endlile ntwanano ni rifu, hi hlangene ni xivandla xa vafi, hambi khombo ri hundza tanihi ndhambi, a ri nga hi fikeli hikuva hi endle vunwa xichavelo xa hina, ni ku xisa xisirhelo xa hina.”

¹⁶Hikwalaho Hosi Yehovha u vurisile, a ku: “Vonani, ndzi veke Siyoni ribye ra masungulo, leri ringiweke, ra le yinhleni, ra risima, leri tiyisiweke. La tiseketelaka eka rona a nga ka a nga hatlisi ku chava.

¹⁷“Ndzi ta teka mfanelo ndzi yi endla xipimo, ni ku lulama ndzi ku endla xiringaniso, kutani xihangu xi ta kukula xichavelo xa vunwa, ni mati ma ta kukuleta xisirhelo xa n'wina.

¹⁸Ntwanano wa n'wina ni rifu wu ta endliwa swahava, ni ku hlangana ka n'wina ni sirha ku nga ka ku nga yimi khombo leri taka tanihi ndhambi loko ri fika ri ta mi vutla;

¹⁹mikarhi hinkwayo loko ndhambi yi ta hundza, yi ta mi khoma; hikuva mundzuku ni mundzuku wu ta hundza, nhlekanhi ni vusiku; mi ta dyondza hi ku tshukisiwa ntsena.”

²⁰Hikuva xilawu a xi nga eneli la rhandzaka ku etlela, ni nguvu a yi nga ringani ku tiphutsela.

²¹Hikuva Yehovha u ta yima tanihi leswi a nga endla entshaveni ya Perasimi; u ta kariha tanihi leswi a swi endleke enkoveni wa Gibiyoni leswaku a tirha ntirho wa yena â€” ntirho lowu hlamarisaka â€” ni ku tirha swa yena swa mahlori.

²²Kutani sweswi tshikani ku tseketsela, swi nga ri leswaku mi engeta mi bohiwa; hikuva ndzi twile eka Hosi, Yehovha wa tinyimpi, leswaku ku lova ka misava hinkwayo ku kaneriwile.

²³Rhiyeketani tindleve, yingisani rito ra mina, yingisani, mi twa rito ra mina:

²⁴Xana murimi a nga rimela ku byala ntsena? Xana a nga tshama a rima a ba mabuwu xana?

²⁵Loko a kukulile, a nga byari aneta xana, a hlwanya ni kumini, a pandzela koro tindlela, a byala barley endzimeni ya yona, ni xifake ematlhelweni!

²⁶Xikwembu xa yena xi n'wi dyondzisile mikhuva leyi, xi n'wi tivisile leswi lulameke.

²⁷Hikuva aneta a yi huriwi hi xileyi, ni kumini a yi huriwi hi xigirigiri; kambe aneta yi huriwa hi nhonga, ni kumini hi nkhavi.

²⁸Koro ya huriwa, kambe a ku tluriwi mpimo wa ku yi hula ni ku yi kandziya hi mavhilwa ya xigirigiri, masondzo ya tihanci ma nga yi fayi.

²⁹Mhaka leyi, na yona, yi huma eka Yehovha wa tinyimpi, loyi a nga ni makungu lama hlamarisaka, ni mitirho leyi dzunekaka.