Read Xitsonga Isaiah 3 Bible Online

Isaiah 3 - Xitsonga bible

Isaiah 3

¹Hikuva maswivo, Hosi, Yehovha wa mavandla u ta tekela Yerusalema, na Yuda xiseketelo hinkwaxo ni rixongotelo hinkwaro, swi ri swakudya hinkwaswo ni swakunwa hinkwaxo,

²hambi yi ri nhenha ni mulwi wa nyimpi, muavanyisi ni muprofeta,

³mungoma ni nkulukumba, tihosi ni tindhuna, mutsundzuxi ni mutirhi wa malwandla, ni mubvumbi la tlhariheke.

⁴Ndzi ta va nyika majaha ti va tihosi ta vona, ni swihlangi swi ta va fuma.

⁵Kutani vanhu va ta welana ehenhla, un'wana ni un'wana u ta dya warikwavo; jaha ri ta pfukela matimba munhu la dyuhaleke ni la solekaka a pfukela la dzunisiwaka.

⁶Kutakuloko munhu a ta khoma makwavo endlwini ya tata wa yena, a ku eka yena: U ni nguvu, u va hosi ya hina; rhumbi leri ri ta hlayisiwa hi wena!

⁷Siku rero u ta hlamula, a ku: “A ndzi swi rhandzi ku va n'anga; a ndzi na vuswa endlwini ya mina, hambi yi ri nguvu; mi nga ka mi nga ndzi veki hosi ya tiko!”

⁸Hikuva Yerusalema wa tsekatseka, Yuda wa dedeleka, hikuva marito ya vona ni mitirho ya vona swi lwa na Yehovha, ku karihisa mahlo ya yena lama kwetsimaka.

⁹Nghohe ya mimombo ya vona ya va avanyisa, va twarisile swidyoho swa vona tanihi Sodoma, kutani a va vuyangi va fihla, ku ni khombo eka mimoya ya vona hikuva hi vona lava tilaveleke ku lova ka vona.

¹⁰Vulani leswaku lava lulameke va katekile, hikuva va ta dya mihandzu ya mitirho ya vona.

¹¹U ni khombo mudyohi, u ni khombo, hikuva u ta nyikiwa hakelo ya mitirho ya mavoko ya yena.

¹²Tiko ra mina ri xanisiwa hi swihlangi, ni vavasati va ri fuma. Tiko ra mina, vafambisi va wena va ku hambukisa ndlela, va onha ndlela leyi u fambaka eka yona.

¹³Yehovha u pfukele ku tenga, u yimele ku avanyisa matiko.

¹⁴Yehovha wa sungula ku avanyisa vakulukumba va tiko ra yena ni tihosi ta rona, a ku: “Mi dyile nsimu ya vhinya, kasi leswi phangiweke eka swisiwana swi kona etindlwini ta n'wina!

¹⁵Mi xanisa tiko ra mina hi matimba wahi, ni ku phyandlasa lava nga ekhombyeni xana?” ku vula Hosi, Yehovha wa tinyimpi.

¹⁶Yehovha u vurile, a ku: “Leswi vanhwana va Siyoni va tikuriseke va famba hi tinhamu leto sihalala va tikurisa hi mahlo, va famba hi ku komisa mikondzo, va chakayila hi masindza ya milenge ya vona,

¹⁷Hosi yi ta byewula tinhloko ta vanhwana va Siyoni ti endla mpandhla, Yehovha u ta funungula tingana ta vona.”

¹⁸Hi siku lero, Hosi yi ta susa masindza lawa va tibombisaka ha wona, ni misirhelelo ya misisi, ni swibombiso swa nkolo;

¹⁹ni swingwavila swa tindleve, ni vusenga, ni swisirhelo swa mombo,

²⁰ni masingasoro, ni swiketanyana swa masindza ya milenge, ni madeveci;

²¹ni swigadzana swa mirhi ya risuna, ni switshungulu, ni swingwavila swa tintiho ni swa tinhompfu;

²²ni tinguvu ta mikhuvo ni mabaji, ni majasi ni swikhwama;

²³ni swivonivoni, ni tinguvu leto vonikela, ni maduku, ni mixikitelo.

²⁴Ematshan'weni ya leswo nun'hwela, ku ta va ku bola; ni le matshan'weni ya deveci, ku ta va pindza; ematshan'weni ya misisi leyi horhiweke, ku ta va mimpandhla; ematshan'weni ya tinguvu leto kokakoka, ku ta va saka lero khwaxa; ematshan'weni ya vumbhurhi, ku ta va xisandzu lexi funghiweke hi ndzilo.

²⁵Vavanuna va wena va ta dlawa hi fumu, ni tinhenha ta wena ti ta helela enyimpini.

²⁶Tinyangwa ta Siyoni ti ta konya ti vovola, kutani u ta tshamisa ehansi a rila.