Read Xitsonga Isaiah 35 Bible Online

Isaiah 35 - Xitsonga bible

Isaiah 35

¹Tiko ra ntlhohe ri ta tsaka, ni tiko leri omeke; makwandzasi ma ta tsakisisa, ma rhumbuka kukota khon'wa!

²Ma ta rhumbuka hi ku tlurisa, ma tsakisisa, ma tsaka kunene, ma yimbelela tinsimu to tsaka, ma ta nyikiwa ku vonakala ka Lebanoni, ni ku nona ka Karmele ni ka Xaroni; kutani va ta vona ku kwetsima ka Yehovha, ni vukulu bya Xikwembu xa hina.

³Nyikani mavoko lama tsaneke matimba, mi va mi tiyisa matsolo lama rhekarhekaka!

⁴Mi ku eka va timbilu leti tshukeke: “Rhulani timbilu, mi nga chavi! Vonani, Xikwembu xa n'wina xa ta hi ku rihisa, ku nga ku hakela ka Xikwembu xi ta ta xi ri xona, xi mi hlayisa.”

⁵Hilaha mahlo ya vo fa mahlo ma nga ta hanyanya, ni tindleve leti sivekeke ti nga ta pfuleka;

⁶swilema swi ta tlula kukota tinhlangu, kutani ririmi ra mbheveve ri ta yimbelela hi ku tsaka; hikuva mati ma ta khuluka mananga, ni swinambyana swi ta khulukela emakwandzasini.

⁷Makwandzasi ya misava ma ta hundzuka mativa ya mati, kutani etikweni leri omeke ku ta va ni swihlovo swa mati; etindhawini laha timhungubye ti nga etlela kona, ku ta mila tinhlanga ni mavungu.

⁸Gondzo ri ta va kona, ni ndlela leyi vuriwaka ndlela yo kwetsima; a ku na munhu wa thyaka la nga ta hundza kona; yi ta va ya lavo lulama ntsena. Lava nga ta famba endleleni yoleyo, hambi xi ri xiphukuphuku va nga ka va nga lahleki.

⁹Kona a ku na nghala, a ku na xivandzana lexi nga ta veka nenge kona, ni loko ku ri ku kumiwa kona, kambe lava kutsuriweke va ta fambafamba kona.

¹⁰Lava kutsuriweke hi Yehovha va ta tlhela va ya Siyoni hi tinsimu ta ku tsaka, va vehele etinhlokweni ku tsaka loku nga heriki; ku kateka ni ku tsaka swi ta va hlanganisa, ku vaviseka ni nhlomulo wa mbilu swi ta baleka.