Read Xitsonga Isaiah 40 Bible Online

Isaiah 40 - Xitsonga bible

Isaiah 40

¹Chavelelani, chavelelani tiko ra mina ku vula Xikwembu xa n'wina.

²Vulavulani swa mbilu ya Yerusalema, mi n'wi tivisa leswaku vukhumbi bya yena byi herile, ni leswaku ku dyoha ka yena ku rivaleriwile, kambe u rihiwile kambirhi hi voko ra Yehovha swidyoho swa yena hinkwaswo!

³Rito ri huwelela ri ku: “Lunghisani emananga ndlela ya Yehovha, khulelani emananga ndlela ya Xikwembu xa hina!

⁴Nkova wun'wana ni wun'wana wu ta seleteriwa, ntshava yin'wana ni yin'wana ni xitsunga xin'wana ni xin'wana swi ta mbundzumuxiwa. Xitsunga xi ta hundzuka rivala, kutani tintshava ti ta hundzuka mikova.

⁵Ku vonakala ka Yehovha ku ta humelela, kutani nyama yin'wana ni yin'wana yi ta ku vona, hikuva nomu wa Yehovha wu vurisile.”

⁶Rito ri te: “Huwelela!” Kutani ku hlamuriwa, va ku: “Ndzi ta huwelela yini?” Nyama yin'wana ni yin'wana yi fana ni byanyi, ni ku saseka ka byona ku fana ni xiluva xa nhova.

⁷Byanyi bya oma, xiluva xa vuna loko moya wa Yehovha wu hundzile ehenhla ka xona, kunene vanhu va fana ni byanyi.

⁸Byanyi bya oma, xiluva xa vuna, kambe rito ra Xikwembu xa hina ri ta tshama hilaha ku nga heriki.

⁹Tlhandlukelani entshaveni leyo leha, n'wina lami tiselaka Siyoni mhaka leyo nandziha; tlakusani rito hi matimba, n'wina la mi tiselaka Yerusalema, mhaka leyo nandziha; ri tlakuseni, mi nga chaveni; byelani miti ya Yuda, mi ku: “Hi xona Xikwembu xa n'wina!”

¹⁰Vonani, Hosi, Yehovha wa ta hi matimba; wa fuma hi voko ra yena; vonani, wa ta a ri ni ku khensa ka yena, ku hakela ka yena ku n'wi rhangele.

¹¹Tanihi murisi, u ta risa ntlhambi wa yena; u ta rhola swinyimpfana hi mavoko u ta swi vukarha erhumbyini ra yena, u ta fambisa khwatsi leti an'wisaka.

¹²I mani la pimeke lwandle hi xandla xa yena, la pimeke matilo hi mpimo xana? I mani la pimeke hi xirhundzu ntshuri hinkwawo wa misava, la pimeke tintshava, ni switsunga exikalweni?

¹³La pimeke moya wa Yehovha i mani? Mutsundzuxi wa yena a a ri mani? La n'wi dyondziseke xilo i mani?

¹⁴U vutisile mani, u dyondzisiwe hi mani? U kombisiwile hi mani ndlela ya leswo lulama? I mani la n'wi dyondziseke vutivi, ni la n'wi tiviseke ndlela ya vutlhari?

¹⁵Vonani, emahlweni ka yena, matiko ma fana ni thonsi leri tengatengaka embiteni, ma fana ni ntshuri lowu nga exikalweni. Vonani swihlale, eka yena, swi fana ni ntshuri lowu nga empfhukeni.

¹⁶Xihlahla xa Lebanoni xi nga ka xi nga ringani ndzilo wa magandzelo, ni swifuwo swa kona swi nga ka swi nga ringani timhamba ta magandzelo.

¹⁷Matiko hinkwawo i xilo xa hava emahlweni ka yena; eka yena i swilo swahava ntsena!

¹⁸Mi ta fanisa Xikwembu na mani? Mi ta endla xifaniso xihi xa yena?

¹⁹Mutirhi u nyukisa xifaniso, mufuri wa xi nameka hi nsuku, u nameka eka xona timpecana ta silivhere.

²⁰Xisiwana lexi tsetselelaka swa xona, xi hlawula murhi lowu nga munyiwiki, xi tilavela mutirhi la tlhariheke ku vatla xifaniso lexi nga tsekatsekiki.

²¹A mi swi tivi xana? A mi swi twangi xana? A mi tivisiwanga eku sunguleni? A mi xiyanga ta ku tumbuluka ka misava xana?

²²Hi yena la tshameke empfhukeni, ehenhla ka xirhendzevutana xa misava, kutani vaaki va yona va fana ni tinjiya. U andlala matilo tanihi nguvu leyo vevuka, u ma andlala tanihi tende a ma endla vuako bya yena.

²³Hi yena la endlaka tihosi xilo xa hava, ni vaavanyisi va misava xilo lexi nga riki xa nchumu.

²⁴Va nga si simekiwa ni ku byariwa, nsinya wa vona wu nga si va ni timitsu emisaveni wa huhuta ehenhla ka vona, kutani va vuna, kutani xihuhuri xi va vutla tanihi mungu.

²⁵“Mi ta ndzi fanisa na mani leswaku ndzi fana na yena xana?” ku vula la hlawulekeke.

²⁶Tlakusani mahlo ya n'wina, mi languta! I mani la tumbuluxeke swilo sweswo, la fambiseke hi ku ri xaxameta vandla ra swona xana? U swi vitana hinkwaswo hi mavito ya swona, hi ntamu lowukulu wa yena, ni matimba lamakulu ya yena, ku hava ni xin'we lexi pfumalekaka.

²⁷Oho Yakobo! U vula yini-ke sweswo, na wena Israele u ku: “Ndlela ya mina yi fihliwile emahlweni ka Yehovha, Xikwembu xa mina a xi vuri nchumu hi timhaka ta mina”?

²⁸A ku swi tivi xana? A ku swi twanga xana? I Xikwembu lexi nga heriki, yena Yehovha la tumbuluxeke makumu ya misava; a nga karhali, a nga heri matimba, a nga kona la kambeke vutlhari bya yena.

²⁹U nyika la karheleke matimba ya yena, u pfuxa la heleke mbilu.

³⁰Ti mbhuri ta karhala, ta hela matimba, ni tinhenha ti lava ku wa;

³¹kambe lava tshembaka Yehovha va engeta va kuma matimba lamantshwa. Va ta haha tanihi magama, va ta tsutsuma va nga karhali; va ta famba va nga tsani!