Read Xitsonga Isaiah 43 Bible Online

Isaiah 43 - Xitsonga bible

Isaiah 43

¹Sweswi Yehovha la ku tumbuluxeke, wena Yakobo, la ku vumbeke, wena Israele u vula sweswo, a ku: “U nga chavi nchumu hikuva ndza ku kutsula, ndza ku vitana hi vito ra wena, u wa mina.

²Loko u pela mati, ndzi ta va na wena, ni milambu yi nga ka yi nga ku nwerisi. Loko u famba endzilweni u nga ka u nga tshwi, ni langavi ri nga ka ri nga ku hisi.

³Hikuva hi mina Yehovha, Xikwembu xa wena, Muhlawuleki wa Israele, muponisi wa wena; ndzi ku nyika Egipta ku va ku kutsuriwa ka wena, Etiyopiya na Seba ematshan'weni ya wena.

⁴Hikuva emahlweni ka mina u ni nkoka, u ni ku dzuneka, na swona ndza ku rhandza; ndzi ta ku kutsula hi vanhu, ni vutomi bya wena hi matiko.

⁵U nga chavi hikuva ndzi na wena, ndzi ta vuyisa rixaka ra wena ri huma evuxeni, ndzi ri hlengeleta ri huma evupeladyambu.

⁶Ndzi ta ku eka n'walungu, ‘Humesa!’ ni ka dzonga: ‘U nga arisi!’ Vuyisa vana va mina ematikweni ya le kule, ni vanhwana va mina hi le makun'wini ya misava,

⁷hinkwavo lava thyiweke hi vito ra mina vona lava ndzi va endleleke ku vonakala ka mina, lava ndzi va vumbeke, lava ndzi va endleke!”

⁸A va humese tiko lero fa mahlo leri nga ni mahlo, ni vo fa tindleve lava nga ni tindleve!

⁹Matiko hinkwawo a ma hlengeletane kun'we, kutani tinxaka ta vanhu a ti hlangane! I mani exikarhi ka vona la bvumbheke timhaka leti? I mani la hi twiseke leswi bvumbhiweke eku sunguleni xana? A va humese timbhoni ta vona, va kombisa ku lulama ka vona! Vanhu a va yingise va ku: “Hi swona!”

¹⁰“Mi timbhoni ta mina,” ku vula Yehovha, “N'wina ni nandza wa mina loyi ndzi n'wi hlawuleke, hileswaku mi ta swi tiva, mi ndzi pfumela, mi va mi swi twa leswaku hi mina: Emahlweni ka mina a ku nga si va na xikwembu lexi endliweke, endzhaku ka mina ku nga ka ku nga vi na xin'wana.

¹¹“Hi mina, mina Yehovha ehandle ka mina a ku na muponisi!

¹²Hi mina la kombiseke, la poniseke, la bvumbheke; a hi xikwembu xa matiko lexi endleke swona exikarhi ka n'wina; mi timbhoni ta mina,” ku vula Yehovha: “Hi mina Xikwembu.

¹³Ndzi xona ka ha ri eku sunguleni, a ku na la lamulaka evokweni ra mina; ndzi ta tirha; ku ta ala mani?”

¹⁴Yehovha Mukutsuri wa n'wina, Muhlawuleki wa Israele u vula sweswo, a ku: “Hikwalaho ka n'wina ndzi rhumile nala ku hlasela Babilona, ndzi va balekisa hinkwavo, hambi va ri Vakalediya emabyatsweni lawa va nga tidzunisa ha wona.

¹⁵Hi mina Yehovha, Muhlawuleki wa n'wina, Muendli wa Israele, Hosi ya n'wina!”

¹⁶Ku vula Yehovha, la boxeke ndlela elwandle, ni ntila ematini lamakulu.

¹⁷La hlomiseke tigolonyi ni tihanci, nyimpi ni tinhenha ta matimba. Hinkwavo va wile va nga ha pfuki va herile va timekile tanihi rivoni.

¹⁸“Mi nga ha tsundzuki leswi hundzeke, mi nga ha ehleketi swa khale.

¹⁹Vonani, ndzi ta endla xilo lexintshwa, lexi nga ta humelela sweswi; xana mi nga ka mi nga xi tivi? Ndzi ta endla ndlela emananga, ni milambu enhoveni.

²⁰Swiharhi swa nhova swi ta ndzi dzunisa, vahlati ni tiyimbhu, hikuva ndzi ta va ndzi vekile mati emananga; ni milambu enhoveni, ku nwisa tiko ra mina, a nga muhlawuriwa wa mina.

²¹Tiko leri ndzi tiendleleke rona ri ta vula ku dzuneka ka mina.

²²“A ku ndzi khongelanga, wena Yakobo; hikuva u karhele ha mina, wena Israele.

²³A ku ndzi humeselangi tinyimpfu ta tiholokosta ta wena, a ku ndzi tlangelanga hi timhamba ta wena. A ndzi ku sindzisanga ku humesa mihlengo, a ndzi ku karhatelanga mirhi ya risuna.

²⁴A ku ndzi xavelangi maakha hi mali, a ku ndzi xurhisanga hi mafurha ya timhamba ta wena, kambe u ndzi xanisile hi swidyoho swa wena, u ndzi karhatile hi ku biha ka wena.

²⁵“Hi mina, hi mina ntsena loyi a hlangulaka ku dyoha ka wena hikwalaho ka mina, kutani ndzi nga ka ndzi nga ha anakanyi swidyoho swa wena.

²⁶Ndzi tsundzuxe, a hi kaneleni swin'we, vulavula u ri wena, ku tibasisa.

²⁷Tata wa wena lowo rhanga u dyohile, vahlamuseri va nawu va wena va ndzi dyohele.

²⁸Hikwalaho ndzi sorile tihosi ta vukwetsimelo ndzi nyiketile Yakobo ku yirisiwa, na Israele ku rhukaniwa.